रोनाल्डोले गरे करियरकै ३९ औं ह्याट्रिक
काठमाडौंः पोर्चुगलका कप्तान तथा रियल मड्रिडका स्टार खेलाडी क्रिष्टियानो रोनाल्डोले करियरको ३९ औं ह्याट्रिक गरेका छन्।
गएराति एथ्लेटिको मड्रिडको घरेलु मैदानमा भएको ला लिगा फुटबल अन्तर्गत भएको मड्रिड डर्बीमा एथ्लेटिकोविरुद्ध रोनाल्डोले गरेको ह्याट्रिक उनको करियरको ३९ औं ह्याट्रिक हो।
रोनाल्डोले एथ्लेटिको मड्रिडमाथि ह्याट्रिक पूरा गर्ने क्रममा खेलको २३ औं, ७१ औं र ७७ औं मिनेटमा गोल गरेका थिए। रोनाल्डोले करियरको ३९ औं ह्याट्रिकमात्र पूरा गरेनन्, मड्रिड डर्बीमा सवैभन्दा बढी गोल गर्ने खेलाडी समेत बने।
अफेर्डो डी स्टेफानोको नाममा रहेको मड्रिड डर्बीको १७ गोलको रेकर्ड ३१ वर्षीय स्टार खेलाडी रोनाल्डोले तोडे। रोनाल्डोले सन् २००९ मा रियल मड्रिड आएयता मड्रिड डर्बीमा अहिलेसम्म १८ गोल गरेका छन्।
रोनाल्डोले यो सिजन ला लिगामा ८ गोल गरेका छन्। ला लिगामा बार्सिलोनाका लियोनल मेसी र लुइस स्वारेजले पनि समान ८–८ गोल गरेका छन्।
प्रतिक्रिया दिनुहोस !
