हजार भारु हजार नेरुमा साट्दै
मंगलसेन: भारत सरकारले पाँच सय र हजारदरका भारु नोटको कारोबारमा प्रतिबन्ध लगाएपछि दैनिक जीवनयापन गर्न भारु नोट पनि समानदरका नेपाली नोटमा साट्न यहाँका वासिन्दा बाध्य भएका छन् । हातमा भारु पाँच सय र एक हजारका नोट भए पनि बजारमा कसैले नसाटेपछि पाँच सय भारुको पाँच सय नेपाली र एक हजार भारुको एकै हजार नेपालीमा साट्न थालिएको छ ।
आफ्नो तत्कालको समस्या समाधान गर्न पाँच सय भारुमा तीन सय नेपाली र एक हजार भारुमा ६ सय नेपाली रुपैयाँ घाटा खाएर भए पनि साट्न थालिएको हो । यहाँका अधिकांश पुरुष भारतमा रोजगारी गरिरहेकाले त्यहाँबाट आउने भारतीय रुपैयाँले नै ग्रामीण अर्थतन्त्र धानिरहेको बेला भारत सरकारको यस्तो निर्णयले सर्वसाधारणदेखि ठूलाठूला व्यापारीमा समेत असर परेको हो ।
सदरमुकाम मंगलसैन, व्यापारिक केन्द्र साँफेबगर, कमलबजार, विनायकलगायतका बजारमा केही व्यापारीले भारु नोट बराबरको नेपाली रुपैयाँ दिएर भारु नोट संकलन गरिरहेका छन् । मंगलसैनका एक व्यापारीले केही व्यक्ति समस्या परेर भारु बराबरकै नेपाली रुपैयाँ भए पनि दिन भरेर साट्न आउने गरेको बताए । ती व्यापारीले आफूकहाँ दैनिक १०-१५ त्यसरी आउने गरेको सुनाए ।
हातमा भारु पैसा भएर पनि काम नचल्दा सदरमुकाममा थुप्रै मानिस समस्या परेको देखिन्छ । कांग्रेस अछामका कोषाध्यक्ष झंकरबहादुर साउदले आफूसँग भारु नोट मात्र भएकाले सदरमुकाममा सारै समस्या भोग्नु परेको सुनाए ।
आफूसँग नेपाली नोट नहुँदा सापटी मागेर काम चलाउनु परेको उनको भनाइ छ । विषेशगरी घरको कुनै सदस्य भारतमा नोकरी गर्नेका परिवारलाई खर्च चलाउन समस्या भइरहेको छ ।
यस्तै व्यापारीलाई पनि भारु पाँच सय र एक हजारको नोट नचल्दा कारोबार गर्न समस्या भोग्नु परेको छ । गाउँबाट प्राय व्यापारीले भारु नोट बढी ल्याउने भएकाले सामान खरिदबिक्री गर्न समस्या भएको मंगलसैनका व्यापारी देवराज उपाध्यायले बताए ।
प्रतिक्रिया दिनुहोस !
