भन्सार छलेर भारतीय कपडा तस्करी 

विराटनगरः चिसो बढेसँगै भन्सार छलेर भारतबाट न्याना कपडा तस्करी हुन थालेको छ । नेपाल-भारत सीमा सुरक्षा र तस्करी नियन्त्रणको मुख्य जिम्मेवारी पाएको सशस्त्र प्रहरीले सोमबार ठूलो परिणामको न्याना कपडा बरामद गरेपछि तस्करी हुन थालेको पुष्टि भएको हो ।

सशस्त्र प्रहरी बल विराटनगर भन्सार राजस्व गुल्मको टोलीले पाँच लाख रुपैयाँ बजार मूल्य पर्ने कपडा बरामद गरेर आवश्यक कारबाहीका लागि विराटनगर भन्सार कार्यालयमा बुझाएको छ । गुल्मका डीएसपी तीर्थबहादुर थापाका अनुसार विराटनगर २० दरैयाबाट कपडा बरामद गरिएको हो ।

उनका अनुसार जाडोमा लगाउने ऊनीको लेगिज, टप्स, जम्पर, ज्याकेट, कुर्ता सलवारलगायतका कपडा नियन्त्रणमा लिइएको छ । सशस्त्र आएको थाहा पाएपछि तस्करीमा संलग्न भने फरार बनेका थिए ।

‘भारतबाट कपडा तस्करी भएर आइरहेको छ भन्ने विशेष सूचनाका आधारमा परिचालित सशस्त्र प्रहरीको टोलीले कपडा बरामद गरेको हो,' डीएसपी थापाले भने, ‘बरामद गरिएका सबै कपडा कारबाहीका लागि भन्सार कार्यालयमा बुझाइएको छ ।'

बोरा भित्र हालेर ल्याउँदै गरेको अवस्थामा भन्सार छलेको तस्करीको कपडा फेला परेको सशस्त्र प्रहरीले जनाएको छ । सशस्त्र प्रहरीले तस्करीमा संलग्नले भारतसँग सीमा जोडिएका मोरङका रंगेली, बुधनगर, मटेरुवा, खयरवना, सिक्टी, दरैया र सुनसरीको अमडुवा, साहेवगन्ज, भन्टारबारी, भुटाहा, हुस्कीलगायतका नाका प्रयोग गर्न थालेको जनाएको छ । विराटनगरको जोगबनी नाकामा नेपाल र सशस्त्र प्रहरीले कडाइ गरेसँगै तस्करीमा संलग्नले नयाँ रुटको प्रयोग गर्न थालेको डीएसपी थापाले बताए ।

‘सीमा क्षेत्रबाट हुने कपडा र अन्य सामान तस्करी यसअघि ठप्प नै थियो,' उनले भने, ‘जाडो सुरु भएपछि न्यानो कपडा तस्करी गर्न तस्कर सक्रिय हुन थालेको पाइएको छ ।' भारतमा एक हजार र पाँच सय दरका ठूला नोटमा प्रतिबन्ध लगाइए पनि तस्करीमा संलग्नलाई भने यसले कुनै प्रभाव नपारेको निस्कर्ष सशस्त्र प्रहरीले निकालेको छ ।

तस्करले सीमा जोडिएका मोरङका रंगेली, बुधनगर, मटेरुवा, खयरवना, सिक्टी, दरैयालगायत नाका प्रयोग गर्न थालेका छन् । 

सशस्त्र प्रहरीले बरामद गरेर बुझाएका सामानको मूल्यांकन दुई लाख छ हजार रुपैयाँ भन्सारले गरेको छ । सशस्त्र स्रोतका अनुसार प्रायः बजार मूल्यभन्दा एकदेखि डेढ सय प्रतिशतसम्म कम मूल्य राखेर बुझाइएका अवैध सामानको मूल्यांकन भन्सार कार्यालयले गर्ने गरेको छ । तर, त्यही सामानको मूल्य बजारमा भने उच्च हुने गरेको छ ।

पूर्वक्षेत्रीय सशस्त्र प्रहरी प्रमुख डीआईजी सुरज श्रेष्ठले चिसो मौसममा भारतबाट भन्सार छलेर न्याना कपडाको तस्करी हुन थालेको पाइएपछि सबै ठाउँमा कडाइ गरिएको बताए ।

‘न्याना कपडादेखि अन्य सामानसमेत तस्करी हुन सक्ने सम्भावनालाई मध्यनजर गर्दै कडाइ थालिएको छ,' उनले भने, ‘सीमावर्ती क्षेत्रमा कार्यरत सशस्त्र प्रहरीका सबै युनिटलाई सतर्क रहन निर्देशन दिईसकिएको छ ।' डीआईजी श्रेष्ठले तस्करी नियन्त्रणका लागि सीमावर्ती क्षेत्रमा उच्च सतर्कता अपनाउन सशस्त्र प्रहरीको विशेष टोलीसमेत परिचालन गरिएको बताए । 

तस्करीका लागि भारतसँग सीमा जोडिएका मोरङका रंगेली, बुधनगर, मटेरुवा, खयरवना, सिक्टी, दरैया र सुनसरीका अमडुवा, साहेवगन्ज, भन्टारबारी, भुटाहा, हुस्कीलगायतका नाका प्रयोग गर्न थालेका छन् ।