'सिरियामा शान्ति हुनेमा आशा छैन'

लिमाः संयुक्त राज्य अमेरिकाका राष्ट्रपति बाराक ओबामाले निकट भविष्यमा सिरियामा शान्ति कायम हुनेमा आफू आशावादी नभएको बताएका छन् । रूसको समर्थनमा सिरिया सरकारले अलेप्पो नगरमा विद्रोहीमाथि बम आक्रमण जारी राखेका त्यहाँ शान्ति कायम हुनेमा उनले आशंका गरेका हुन् ।

ओबामाले भने, ‘म केही समयभित्रै सिरियामा शान्ति कायम हुने सम्भावनाबारे आशावादी छैन ।' उनले सिरियामा अशान्ति मचाउन सहयोग गरेको भन्दै इरानको पनि आलोचना गरे । उनले भने, ‘रूस र इरानले सिरियाली राष्ट्रपति बसर अल असदको नृशंसक अभियानलाई समर्थन गरिरहेका छन् ।'

यस्तो अवस्थामा प्रशिक्षित एवं प्रतिबद्ध विपक्ष लामो समयसम्म सरकारको विरोधमा उत्रन नसक्ने पनि उनको भनाइ थियो । सिरियामा विद्रोहीलाई पश्चिमा देशहरूले सहयोग गरिरहेका छन् । सरकारलाई भने रूसको समर्थन प्राप्त छ ।

यमनमा युद्धविराम समाप्त

यसैगरी अमेरिकाको पहलमा गत शनिबारदेखि लागू गरिएको ४८ घण्टा लामो युद्धविरामले यमनमा विगत करिब दुई वर्षदेखि हिंसालाई सम्बोधन नगरीकनै सोमबार अन्त्य भएको छ ।

दुवै समूहद्वारा युद्धविराम भंग गर्दै आक्रमण जारी राखेको भनी एकआपसमा दोषारोपण गर्दै ४८ घण्टा लामो युद्धविराम शान्तिका लागि थप विस्तार हुन नसकेको जनाएका छन् । यमनमा सन् २०१५ को मार्चदेखि जारी राजनीतिक अस्थिरता तथा रक्तपातपूर्ण हिंसा अन्त्य गर्न भनी अमेरिकी विदेशमन्त्री जोन केरीको पहलमा पछिल्लो सहमति भएको थियो ।

सयौं युद्धविराम विरोधी गतिविधि शनिबारपछि सोमबारसम्मको समयमा भएका भन्दै यसलाई थप विस्तार गर्नुको औचित्य नरहेको भनी युद्धविराम सम्झौता उल्लंघन हुनुमा दुवै पक्षले एकआपसमा दोषारोपण गरेका छन् ।

साउदी अरब नेतृत्वको गठबन्धन सेनाले सोमबार मध्याह्नदेखि युद्धविराम अन्त्य भएको पुष्टि गरेको छ । युद्धविराम सम्झौतालाई पालना गरिएन बरु एकपछि अर्को हिंसाका घटना विद्रोहीद्वारा देशैभर गराएका, साउदी अरब नेतृत्वको गठबन्धन सेनाका प्रवक्ता मेजर जनरल अहमद असिरीले बताए ।

यमनको दक्षिणपश्चिममा अवस्थित सहर तायजमा युद्धविराम समयमा समेत विद्रोही आक्रमणमा एकपछि अर्को गर्दै धेरै मनिसको ज्यान गएको भन्दै युद्धविराम सम्झौताको औचित्य समाप्त भएको प्रवक्ता असिरीले जनाए । युद्धविराम अन्त्यसँगै सरकार तथा विद्रोही पक्षले आफ्ना आक्रमणलाई सशक्त बनाएका छन् ।