झापालाई हराउँदै एपीएफ सेमिफाइनलमा

सुरुंगा झापाः झापाको सुरुंगामा जथारी सहारा सुरुंगा गोल्डकप फुटबल प्रतियोगिताको सोमबार भएको खेलमा सशस्त्र प्रहरी बलको एपीएफ क्लबले सफलता हात पारेको छ । एपीएफ क्लबले रमपम झापा—११ लाई टाइब्रेकरमा हराउँदै सेमिफाइनलमा स्थान पक्का गर्‍यो । खेलमा एपीएफ क्लब टाइब्रेकरमा ५-४ गोलले विजयी भयो ।

अधिकांश समय झापाले बल आफ्नो नियन्त्रणमा राखे पनि निर्धारित समयभित्र गोल गर्न नसक्दा खेल टाइब्रेकरमा पुगेको थियो । झापाले गोल गर्ने धेरै अवसर सिर्जना गरे पनि स्ट्राइकर कर्ण लिम्बू र विशाल राईबीच तालमेल नमिल्दा फिनिसिङ पक्ष भने कमजोर देखिएको थियो ।

एपीएफका राजेन्द्र रावलले पहिलो हाफको २१ औं मिनेटमा गरेको सशक्त प्रहारलाई झापाका गोलरक्षक दिनेश थापामगरले उत्कृष्ट बचाउ गरेका थिए । दोस्रो हाफमा झापा केही सम्हालिएको थियो ।

दोस्रो हाफको छैटौं मिनेटमा झापाका परिवर्तित खेलाडी पूजन उपरकोटीले गरेको सशक्त प्रहार गोलपोस्टभन्दा केही टाढाबाट बाहिर हुइँकिएको थियो । लगत्तै कर्ण लिम्बूले दिएको पासमा अर्का स्ट्राइकर योगेश गुरुङले गरेको कडा प्रहारलाई एपीएफका गोलरक्षक अमृत चौधरीले बचाउ गरेका थिए ।

टाइब्रेकरमा राष्ट्रिय टोलीका सदस्यसमेत रहेका डिफेन्डर देवेन्द्र तामाङको प्रहार बाहिरिएपछि झापा ५-४ ले पराजित भएको थियो । एपीएफका तर्फबाट रञ्जन विष्ट, नवीन लामा, आदित्य चौधरी, मिलन राई र पाल्सङ लामाको प्रहार गोलमा परिणत भएको थियो । झापाका लागि भने योगेश गुरुङ, रवि थापामगर, दिलेन लोक्ताम र रञ्जित श्रेष्ठले मात्र गोल गरेका थिए ।

हजारौं घरेलु दर्शकको समर्थन पाएको झापाले गोल गर्न नसक्दा समर्थक निरास भएका थिए । उपाधिको दाबेदार मानिएको झापा पहिलो चरणबाटै बाहिरिएपछि बाँकी खेलमा दर्शकको उपस्थिति कम हुने आयोजकको ठम्याइँ छ । उक्त खेलमा एपीएफ क्लबका रञ्जन विष्ट म्यान अफ दी म्याच घोषित भए ।

उनललाई मेची मोबाइलको तर्फबाट एउटा एन्ड्रोइड फोन पुरस्कार प्रदान गरियो । मंगलबारको खेल मनाङ मस्र्याङ्दी क्लब र संकटा क्लब काठमाडौंबीच हुने जानकारी आयोजक कमिटीका सल्लाहकार कुमारमणि पोखरेलले दिए ।