काठमाडौँः नेपाली कांग्रेसले संविधान संशोधन प्रस्ताव दर्ता गर्नुभन्दा पहिले मधेशी मोर्चासँग छलफल गरेर अगाडि बढ्ने भएको छ ।
सिंहदरबारस्थित पार्टीको संसदीय कार्यालयमा मंगलबार बसेको पदाधिकारी र पूर्वपदाधिकारीको बैठकमा संविधान संशोधनका विषयलाई मूर्तरुप दिने विषयमा छलफल भएको थियो ।
बैठकबारे जानकारी दिँदै पार्टीका वरिष्ठ नेता रामचन्द्र पौडेलले संविधान संशोधनका विषयमा मधेसी मोर्चासँग र अन्य सरोकारवालासँग छलफल गरेर अगाडि बढ्ने विषयमा छलफल भएको बताए ।
संशोधनको विषयमलाई अझ मूर्तरुप दिनका लागि सबै राजनीतिक दलसँग छलफल गर्ने विषयमा पार्टीमा छलफल भएको नेता पौडेलले उल्लेख गरे ।
संविधान संशोधनका विषयमा प्रमुख प्रतिपक्ष दल एमालेसँग कुरा नमिलेपछि सत्तारुढ दलले राजनीतिक संवादलाई तीब्र बनाएका छन् ।
बैठकबारे कांग्रेस महामन्त्री विमलेन्द्र निधिले संविधान संशोधनका विषयमा बुधबार प्रधानमन्त्री पुष्पकमल दाहाल ‘प्रचण्ड’सँग मधेसी मोर्चा र सरकारमा सामेल अन्य दलसँग छलफल गरेर संशोधनको प्रस्ताव तयार पार्ने बताए ।
नेपाली कांग्रेसले संशोधनका वातावरण कसरी बनाउने भन्ने विषयमा छलफल भइरहको उपप्रधान तथा गृहमन्त्रीसमेत रहेका निधिले उल्लेख गरे।
त्यसैगरी काँग्रेसका नेता अर्जुननरसिंह केसीले सीमाङ्कन, भाषा, नागरिता र राष्ट्रियसभाको प्रतिनिधित्वलगायतका विषयमा छलफल भएको बताए ।
एमाले र मधेसी मोर्चासँग छलफल गरेर यस विषयमा निष्कर्षमा पुगिने जानकारी दिँदै उनले पाँच प्रदेशको सीमाङ्कनका विषयमा त्यहाँकै जनप्रतिनिधिका विषयमा कुरा गरेर अगाडि बढ्ने बताए ।
उनले भने, ‘अङ्गीकृत नागरिकलाई मुलुकको सर्वोच्च पद दिने कुरो कुनै हालतमा स्वीकार्न सकिँदैन ।’
प्रतिक्रिया दिनुहोस !
