एउटै टहरामा तीनवटा कक्षा

सेमजोङ (धादिङ): एउटा बाँसले बनाएको टहरो, तीनवटा लहरमा राखिएका डेस्कबेन्च र एउटै टहराभित्र तीनजना शिक्षिका । हेर्दा जोसुकैले पनि विद्यार्थीबीच कुनै अतिरिक्त क्रियाकलाप गराइरहेजस्तो लाग्छ तर त्यसो होइन । यहाँ एउटै टहराभित्र तीनवटा कक्षाको पठनपाठन भइरहेको छ । उत्तरी धादिङको सेमजोङ गाविसस्थित बुद्ध प्राविको भवन २०७२ को विनाशकारी भूकम्पले भत्काएपछि उत्पन्न भएको अवस्था हो यो ।

भूकम्पपछि विद्यालयको भवन पूरै भत्किएर पठनपाठन ठप्प भएका बेला विद्यालय व्यवस्थापन समिति र अभिभावकले बनाएको टहरोमा अहिलेसम्म पढाइ भइरहेको छ । आर्थिक अभावका कारण धेरैवटा अस्थायी टहरा बनाउन नसकिएपछि बाध्य भएर एउटै टहरोमा तीनवटा कक्षाका विद्यार्थी राखेर पढाउनुपरेको शिक्षिका रोजिना तामाङले बताइन् ।

'एक महिनासम्म विद्यालय नै खुलेन । त्यसपछि पनि सबै कक्षाका विद्यार्थी एकै ठाउँमा भए । विद्यालय आए पनि पढ्ने ठाउँ थिएन', उनले भनिन्, 'खुला चौरमा राखेर विद्यार्थीलाई भूकम्पबारे जानकारी दिने र सान्त्वना दिने गर्न थालियो । केही समयपछि अस्थायी सिकाइ केन्द्र बन्यो । सबै कक्षाका विद्यार्थीलाई एउटै कक्षामा राखेर पढाउन थालियो ।'

भूकम्पअघि ८० जना विद्यार्थी अध्ययन गर्ने यो विद्यालयमा अहिले ४० जनामात्र छन् । बाँसले बारेर बनाइएको एउटा टहरामा कक्षा तीन, चार र पाँचको पढाइ हुन्छ । तीनवटै कक्षामा एकैपटक अध्ययन गर्दा एकबाट अर्कोमा हल्ला हुने, पढाएको कुरा विद्यार्थीले नबुझ्ने, कक्षाकार्य गराउन अप्ठ्यारो हुनेजस्ता समस्या रहेको उनले बताइन् ।

एउटा कक्षामा पढाउँदा अर्को कक्षाका विद्यार्थीलाई समस्या भएपछि विद्यार्थी पनि अलमलमा पर्ने गरेका छन् । दुवैतिरको पढाइले दुवै कक्षामा असर गरिरहेको छ । बाँसको पातलो बारले कक्षा कोठा छुट्ट्याएको भए पनि त्यसले एउटा कक्षाको हल्ला अर्कोमा जान रोक्न सकेको छैन । तीन कक्षाका विद्यार्थीले चार र पाँच कक्षाको पाठ पनि सुन्छन् । आफ्नै कक्षाको पाठ राम्रोसँग नबुझेका विद्यार्थी अरू कक्षाको पढाइले रनभुल्लमा पर्ने गरेका छन् ।

यसरी पढाउन थालेको पनि डेढ वर्ष भइसक्यो । तर अस्थायी टहरोबाहेक विद्यालयमा कुनै पनि भवन बनेन । फरकफरक कक्षाकोठा बनाउन जिल्ला शिक्षा कार्यालयमा पटकपटक पाल माग गरिए पनि छिट्टै विद्यालयको पक्की भवन बन्ने भनेर कुनै पनि सहयोग प्राप्त नभएको अभिभावकले बताए ।

यो वर्ष तीनवटै कक्षालाई एउटै टहरामा राखेर पढाइए पनि अर्को वर्षदेखि भने विद्यार्थीले नयाँ भवनमा पढ्न पाउने विद्यालयका प्रधानाध्यापक मेनुका तामाङको भनाइ छ । हाल उक्त विद्यालयको पक्की भवन नर्वेजियन राजदूतावासको सहयोगमा निर्माण भइरहेको छ । यो विद्यालयसँगै सेमजोङ गाविसका छवटा विद्यालयका पक्की भवन नर्वेजियन राजदूतावासको सहयोगमा जर्मन विकास सहयोगले निर्माण गर्न थालेको छ ।