पोखराः पोखरा नजिककै चापाकोट गाउँमा बुधबार बिहान अल्ट्रालाइट जहाज दुर्घटना हुँदा पाइलटको मृत्युभएको छ । एभिया क्लबको ‘नाइन एन ए एलएल' कल साइनको जहाज दुर्घटनामा परेको हो । उक्त क्लबको आफ्नै जहाज मैदानबाट उडानका क्रममा दुर्घटना भएको कास्की प्रहरीले पुष्टि गरेको छ ।
डिएसपी गजुसिद्धि वज्राचार्यका अनुसार पाइलट अलेक्जेन्डर म्याक्सीमोभको दुर्घटनास्थलमै मृत्युभएको हो । एकजना यात्रु क्यानडेली नागरिक २७ वर्षीया जिलन मेरी भोल्करको गण्डकी शिक्षण अस्पतालमा उपचार गरिएको छ ।
पाइलटले ह्यान्डग्लाइडरको डोरी तानेर उडान गर्ने क्रममा दुर्घटना भएको थियो । जहाजले भुइँ छाड्ने बित्तिकै दुर्घटना भएको थियो । पाइलट र एक यात्रुमात्रै चढ्न मिल्ने यो जहाज दृश्यावलोकनका लागि प्रयोग हुँदै आएको छ ।
तीन वर्ष अघि अल्ट्रा लाइट दुर्घटनामा दुई जनाको मृत्यु भएको थियो । २०७० सालको असोजमा पोखरा विमानस्थलबाट उडेको विमान पुम्दीभुम्दीमा दुर्घटना भएको थियो । दुर्घटनामा पोखराका स्टेफन श्रेष्ठ र एक चिनियाँ पर्यटकको ज्यान गएको थियो ।
पोखरा उपत्यकाको मनोरम दृष्य अवलोकन गर्न पर्यटकहरुले अल्ट्रा लाइट विमान प्रयोग गर्दछन् । सो विमानले पर्यटकलाई घुमाउन पोखरा उपत्यकामा मात्र उडान भर्दछ । एक चालक र एक यात्रु गरी दुईजना मात्र अट्ने सो विमानलाई स्थानीयले 'पुतली जहाज' नाम दिएका छन् ।
प्रतिक्रिया दिनुहोस !
