एभरेस्टले किन्यो श्रीका दुई हेलिकोप्टर

काठमाडौंः निजी क्षेत्रको पछिल्लो हेलिकोप्टर कम्पनी एभरेस्ट हेलीले श्री एयरलाइन्सका दुईवटा हेलिकोप्टर खरिद गरी सेवा सञ्चालन गर्ने तयारी गरेको छ । हेलिकोप्टर सेवामा थप हुन लागेको यो नयाँ वायुसेवा कम्पनीले श्री एयरलाइन्सको एएस ३५० बीथ्रीई नामका दुईवटा होलिकोप्टर खरिद गरेको हो ।

हेलिकोप्टर बिक्री गर्ने सम्झौता डेढ महिनाअगाडि नै भैसकेको भए पनि औपचारिक रूपमा स्वामित्व परिवर्तन भने सोमबार मात्रै भएको जानकारी श्री एयरलाइन्सका कार्यकारी अध्यक्ष सुधीर मित्तलले दिए । ‘हाम्रा दुई हेलिकोप्टर एभरेस्ट हेलीले खरिद गरेको छ’, उनले भने ।

एक वर्षअगाडि नै एयरवस हेलिकोप्टरबाट खरिद गरेर ल्याएको नयाँ दुई हेलिकोप्टर श्रीले एभरेस्ट हेलीलाई बिक्री गरेको छ । श्रीसँग चारवटा यस्ता हेलिकोप्टर रहेको भए पनि बाँकी दुईवटा भने नियमित उडानमा छन् ।

बजार मूल्यअनुसार एयरबस हेलिकोप्टरका यस्ता नयाँ हेलिकोप्टर किन्दा एउटाको २५ करोडभन्दा बढी पर्ने भए पनि केही समय सञ्चालन भएकाले प्रतिहेलिकोप्टर करिब २० करोड रुपैयाँमा खरिदबिक्री भएको सम्बन्धित वायुसेवा कम्पनीको भनाइ छ ।

हेलिकोप्टर सेवाको अग्रणी कम्पनी श्रीसँग ६ सिट क्षमताका यस्ता साना हेलिकोप्टर अझै दुईवटा छन् भने एमआई १७ नामका ठूला ६ वटा हेलिकोप्टर छन् । यसका ठूला हेलिकोप्टर दुईवटा अफ्रिकामा, दुईवटा मर्मतमा र दुईवटा भने काठमाडौं विमानस्थलमा नै छन् ।

नेपाली आकाशमा १७ वर्षदेखि हेलिकोप्टर सेवा प्रदान गरिरहेको श्रीले नियमित रूपमा आन्तरिक र अन्तर्राष्ट्रिय उडान सञ्चालन गर्न फिक्स विंग्सका दुईवटा जहाज प्रयोग गर्ने तयारीसमेत गरिरहेको छ ।

यो वायुसेवाले जहाज ल्याएर लामो समय नराख्ने र उडान गर्ने गरी तयारी गरेकाले नेपाल नागरिक उड्डयन प्राधिकरणमा वायुसेवा सञ्चालन अनुमति (एओसी) का निम्ति आवेदन दिएको छ ।

नेपाली आकाशमा १७ वर्षदेखि हेलिकोप्टर सेवा प्रदान गरिरहेको श्रीले नियमित रूपमा आन्तरिक र अन्तर्राष्ट्रिय उडान सञ्चालन गर्न फिक्स विंग्सका दुईवटा जहाज प्रयोग गर्ने तयारी गरिरहेको छ ।

प्राधिकरण स्रोतका अनुसार श्रीको आन्तरिक उडानको वायुसेवाको आवेदन प्रारम्भिक चरणमा नै रहेकाले अनुमति पाउन केही समय पखर्नुपर्ने उल्लेख छ । प्राधिकरणबाट एओसी लिएर सञ्चालनको तयारीमा रहेको यो वायुसेवाले १५ दिनपछि हेलिकोप्टर उडानको योजना बनाइरहेको छ ।

एभरेस्ट हेलीका कार्यकारी अध्यक्ष लाक्पा ग्याल्जेन शेर्पाका अनुसार हेली सञ्चालन गर्न आन्तरिक तयारी तीव्र रूपमा अगाडि बढिरहेको छ । प्राधिकरणबाट अनुमति पाउनासाथ एभरेस्ट हेलीले जहाज उडाउने जानकारी पनि शेर्पाले दिए ।

उनका अनुसार तत्काल दुईवटा हेलिकोप्टर सञ्चालन गर्दै गर्ने र आगामी एक वर्षभित्र अर्को एक नयाँ हेलिकोप्टर थप गर्ने योजना कम्पनीको छ । एभरेस्ट हेलीमा शेर्पासहित ६ जना सञ्चालक छन् । अन्य पाँचजनामा पर्वतारोही मिङ्मा शेर्पा, क्याप्टेन निशल केसी, इन्जिनियरत्रय जनक थापा, ईश्वरी लामिछाने र राजेश्वर श्रेष्ठ छन् ।

‘एभरेस्ट हेलीले सोमबार मात्रै श्री एयरलाइन्सका दुईवटा हेलिकोप्टरको स्वामित्व लिएको जानकारी दिएको छ’, प्राधिकरण हवाई सुरक्षा विभागका एक अधिकारीले भने । उनका अनुसार यो वायुसेवाले जहाज खरिद गरिसकेकाले एओसी पाउने अन्तिम तयारीमा रहेको छ ।

अब जहाजको इस्पेक्सन र डेमोस्टेसन फ्लाइटपछि एओसी पाउने पनि प्राधिकरण स्रोतको भनाइ छ । प्राधिकरणका अनुसार यो वायुसेवाले आवश्यक डकुमेन्ट तयार पारेको अवस्थामा एक साताभित्र एओसी पाउनसक्ने पनि उल्लेख छ ।

विगत दुई वर्षदेखि प्राधिकरणले हवाई उडानमा कडाइका साथ नियमन गर्न थालेकाले कुनै पनि वायुसेवाको अनुमति लिन औपचारिक रूपमा आवेदन दिएको कम्तीमा ६ महिना लाग्छ ।

प्राधिकरणका अनुसार आवश्यक मापदण्ड सबै पूरा गर्न नै कम्तीमा यो समय लाग्छ । यो अवधिमा प्रारम्भिक निवेदन, डकुमेन्टेसन, नो अब्जेक्सन लेटर, इन्सपेक्सन एन्ड डेमोस्टेसनका प्रक्रिया पूरा गरेपछि मात्रै प्राधिकरणले जहाजको उडान अनुमति एओसी दिने गरेको छ ।

आन्तरिक उडानमा एभरेस्ट हेली थप भएपछि हेलिकोप्टर सेवा प्रदायकको संख्या नेपाली सेनाकोसहित १० वटा पुग्ने भएको छ । हाल नेपाली आकाशमा सिम्रिक एयर, मनाङ, नेपाली सेना, श्री एयरलाइन्स, फिस्टेल एयर, माउन्टेन हेलिकोप्टर, एयर डाइनेस्टी, प्रभु हेलिकोप्टर र अल्टिच्युट हेलिकोप्टरले सेवा दिइरहेका छन् ।