न्युयोर्कः लगातार टोलीको कमजोर प्रदर्शनपछि अमेरिकी फुटबल संघले राष्ट्रिय टोलीका प्रशिक्षक योर्गेन क्लिन्सम्यानलाई पदबाट बर्खास्त गरेको छ । खासगरी विश्वकप छनोटमा अमेरिकाको कमजोर सुरुआतपछि क्लिन्सम्यानको पद धरापमा परेको थियो । सन् १९९० मा जर्मनीले विश्वकपको उपाधि जित्दा टोलीको सदस्य रहेका ५२ वर्षीय क्लिन्सम्यान सन् २०११ मा अमेरिकाको प्रशिक्षकमा नियुक्त भएका थिए ।
विश्वकप छनोटअन्तर्गत गत साता भएको खेलमा अमेरिकी टोली कोस्टारिकासँग ४—० गोलले पराजित भएपछि क्लिन्सम्यान निकै निराश देखिएका थिए । उनले उक्त हारलाई नमीठो क्षणको रूपमा चित्रण गरेका थिए । त्यसको केही दिनअघि अमेरिकी टोली मेक्सिकोसँग पनि २–१ गोलले पराजित भएको थियो । अमेरिका विश्वकप छनोटअन्तर्गत अन्तिम चरणको प्रतियोगितामा सुरुका दुई खेलमा पराजित भएको यो पहिलो पटक हो ।
‘मलाई विश्वास छ, विश्वकपमा छनोट गराउन हामीसँग स्तरीय खेलाडीको कमी छैन’ , अमेरिकी फुटबल संघका अध्यक्ष सुनील गुलाटीले भनेका छन् । गुलाटीले क्लिन्सम्यानबारे गरिएको निर्णय अत्यावश्यक भएको बताएका छन्।
‘अहिलेसम्म टोलीको लय र स्तरको प्रगतिअनुसार अब फरक दिशामा जानुपर्ने आवश्यकता महसुस ग¥र्यौं’, गुलाटीको भनाइ छ ।
यसअघि अमेरिकी फुटबल टोलीका कप्तान माइकल ब्राड्लीले पनि तत्काल टोलीमा परिवर्तन आवश्यक रहेको बताएका थिए । सन् २०११ को कन्काकाफ प्रतियोगिताको फाइनलमा अमेरिकाले कमजोर प्रदर्शन गरेपछि क्लिन्सम्यानले अमेरिकी टोलीमा बब ब्राड्लीको ठाउँ लिएका थिए । त्यतिबेला फाइनलमा मेक्सिकोले अमेरिकालाई ४–२ गोलले हराएको थियो ।
त्यसपछि क्लिन्सम्यानकै प्रशिक्षणमा अमेरिकाले सन् २०१३ को कन्काकाफको उपाधि जितेको थियो । सन् २०१४ को विश्वकपमा दोस्रो चरणमा पुगेको अमेरिका नकआउट चरणमा बेल्जियमसँग पराजित भएको थियो । सन् २०१५ को कन्काकाफको सेमिफाइनलमा जमैकासँग पराजित भएको अमेरिका कन्फेडेरेसन कपको प्ले अफमा भने मेक्सिकोसँग निराश भएको थियो ।
यसै वर्ष भएको कोपा अमेरिकाको सेमिफाइनलमा अमेरिकी टोली अर्जेन्टिनासँग ४–२ गोलले हारेको थियो ।
उत्तर, मध्यअमेरिका तथा क्यारेबियन क्षेत्रबाट तीन टोली विश्वकपमा छनोट हुने प्रावधान छ भने चौथो टोलीले प्ले अफ खेल्ने अवसर पाउँछ । प्रतियोगितामा ६ टोली सहभागी छन् । अमेरिकाले पहिलो पटक सन् १९९० को विश्वकप खेलेको थियो । त्यतिबेला विश्वकप छनोट प्रतियोगितामा टोलीले कमजोर प्रदर्शन गरेपछि अमेरिकाले प्रशिक्षक परिवर्तन गरेको थियो ।
त्यसयता अमेरिकाले विश्वकप छनोट प्रतियोगिताका क्रममा प्रशिक्षक परिवर्तन गरेको थिएन । अमेरिका जारी विश्वकप छनोट तालिकामा छैटौं तथा अन्तिम स्थानमा छ । ‘हाम्रो आगामी छनोट खेल सन् २०१७ को मार्चमा छ । त्यसैले हामीसँग त्यो खेलका लागि तयारी गर्ने प्रशस्त समय छ’, गुलाटीले भनेका छन्, ‘विश्वकपमा लगातार आठौं पटक छनोट हुन हामीले अब उत्कृष्ट विकल्पको खोजी गर्नुपर्छ ।’
प्रतिक्रिया दिनुहोस !
