काठमाडौंः कानुन, न्याय तथा संसदीय मामिला मन्त्री अजय शंकर नायकले प्रमुख प्रतिपक्षी एमालेले देखाएको राष्ट्रवादमाथि प्रश्न उठाएका छन् ।
बुधबार रफत सञ्चार क्लबमा आयोजित कार्यक्रममा बोल्दै मन्त्री नायकले एनजिओ आइएनजिओको पैसाले पार्टीलाई व्यवस्थित बनाउने र आफूलाई राष्ट्रवादको प्रदर्शन गर्ने प्रवृत्तिले देश नबन्ने भन्दै एमालेप्रति कटाक्ष गरे ।
प्रमुख प्रतिपक्षी दल एमालेतर्फ लक्षित गर्दै मन्त्री नायकले भने, ‘मुलुकको नेतृत्वदायी भूमिकाबाट पन्छिने र आफूलाई राष्ट्रवादीको रुपमा प्रदर्शन गर्ने प्रवृत्ति हिजोआज बढ्दै गएको छ ।’
मन्त्री नायकले एमाले एनजिओ र आइएनजिओको पैसाले चलेको गम्भीर आरोप लगाएका हुन् । ‘एनजिओ, आइजिओको पैसाले तलदेखि माथिसम्म पार्टी सञ्चालन गर्ने अनि राष्ट्रवादीको ढोङ रच्ने प्रवृत्तिले देश बन्दैन ।’
उनले विदेशीको पैसा लिने र राष्ट्रवादको प्रदर्शन गर्ने प्रवृत्ति राष्ट्र र जनताको लागि दुर्भाग्यपूर्ण भएको समेत बताए ।
एमालेले राष्ट्रवादको नाममा मुलुकका विभिन्न समुदायले उठाएका मागलाई ओझेलमा पार्न खोजेको आरोप उनको छ । ‘राष्ट्रवादको नाममा जनताको जायज माग खाइदिने प्रवृत्ति हावी हुनु देश र जनताको लागि घातक छ,’ उनले भने ।
संविधान संशोधनको प्रक्रियाबाट पन्छिएर एमालेले गल्ती गरेको भन्दै उनले उसको भूमिकाले जनतालाई तीतो अनुभूति गराएको बताए । ‘एमालेजस्तो जिम्मेवार पार्टीले संविधान संशोधन प्रक्रियामा भाग लिन्न भन्न सुहाउँदैन ।’
मन्त्री नायकले पूर्वाग्रह नराखी राष्ट्रको आवश्यकता र समस्यालाई ध्यानमा राखेर सबै एक भएर अघि बढ्नुपर्नेमा जोड दिए ।
प्रतिक्रिया दिनुहोस !
