काठमाडौंः राष्ट्रिय जनमोचा पार्टीका अध्यक्ष एवम् पूर्व उपप्रधानमन्त्री चित्रबहादुर केसी दुर्घटनामा परेका छन् । बुधबार मैतिदेवीबाट कपनस्थित पार्टीको बैठकमा जाने क्रममा केसी माइक्रोबसको ढोकाबाट खसेर घाइते भएका हुन् ।
केसीका भतिजा हिरा शर्माका अनुसार रातोपुल नजिकै माइक्रोबसले सडकको लेन तोडेर भाग्ने क्रममा ब्रेक लगाउँदा अकस्मात माइक्रोको ढोका खोलिएपछि केसी सडकमा खसेका हुन् ।
सडकमा खसेलगत्तै केसी अचेत अवस्थामा पुगेका थिए । स्थानीय र प्रहरीले उनलाई दुर्घटना गराउने माइक्रोमै राखेर प्रहरी कार्यालयमा पुर्याएका थिए ।
प्रहरी कार्यालयमा पुगेपछि होस खुलेका केसीलाई थप उपचारका लागि सिनामंगलस्थित काठमाडौं मेडिकल कलेजमा पुर्याइएको थियाे ।
केसीका सहयोगी दुर्गा शर्माका अनुसार केसीको स्वास्थ्य अवस्था सामान्य छ । केसीले आफूलाई चिकित्सकले कुनै खतरा नभएको बताएका छन् । केसीका सहयोगी शर्माले भने, ‘उहाँले अस्पतालबाटै स्वास्थ्य अवस्थाप्रति चासो र चिन्ता व्यक्त गर्ने सबैलाई धन्यवाद दिनुभएको छ ।’
प्रतिक्रिया दिनुहोस !
