काठमाडौँ: बिहीबार साँझ प्रधानमन्त्री पुष्पकमल दाहाल ‘प्रचण्ड’लाई भेट्न पूर्वप्रधानमन्त्री एवम् एमाले अध्यक्ष केपी शर्मा ओली प्रधानमन्त्री निवास वालुवाटार पुगेका छन् ।
ओली नेता बामदेव गौतम, भीम रावलसहितका नेतालाई लिएर वालुवाटार पुगेका हुन् । भेटमा संविधान संशोधन र पुरक बजेटको तयारीका विषयमा छलफल भएको प्रधानमन्त्रीको निजी सचिवालयले जनाएको छ ।
भेटमा प्रधानमन्त्री प्रचण्डले संविधान संशोधनका विषयमा मिलेरै अघि बढ्न आग्रह गरेका छन् । प्रचण्डले संविधान संशोधन सँगै पुरक बजेटका विषयमा समेत सुझाव मागेका छन् ।
एमालेविरुद्ध कडा देखिएका प्रधानमन्त्री प्रचण्ड पछिल्ला दिनमा भने एमालेलाई फकाउने रणनीतिमा लागेको देखिन्छ । प्रचण्डले बिहीबार साँझको भेटमा मुलुकलाई दुर्घटनाबाट जोगाउन प्रमुख राजनीतिक शक्तिहरु एक ठाउँमा उभिनु पर्ने आवश्यकतामा जोड दिए ।
उनले संविधान संशोधनको पक्षमा आउन एमालेका नेताहरुलाई आग्रह गरे । भेटमा संविधान संशोधनको विपक्षमा जाने अडान त्यागेर संशोधनको पक्षका आउन एमाले नेतालाई प्रधानमन्त्रीले विशेष आग्रह गरेका छन् ।
प्रधानमन्त्रीले मधेशबाट प्रतिनिधित्व गर्ने एमालेका ३७ जना सांसदहरु संविधान संशोधनको पक्षमा आएको प्रसंग उल्लेख गर्दै संविधान संशोधनको विपक्षमा जानु एमालेका लागि पनि हितकर नहुने सुझाव दिए ।
संविधान संशोधनको औचित्य माथि प्रश्न उठाउँदै आएका एमालेका नेताले संसदमा संशोधन विधेयक दर्ता गरेमा संसद र सडकमा आन्दोलन गर्ने चेतावनी दिदै आएका छन् ।
केही दिन अघि बालुवाटारमा सम्पन्न तीन दलको बैठक संविधान संशोन र संघीयताका विषयमा शीर्ष नेताबीच कुरा नमिल्दा चर्काचर्कीमा परिणत भएको थियो ।
प्रतिक्रिया दिनुहोस !
