बार्सा र म्यान सिटी नकआउट चरणमा 

लन्डनः प्रशिक्षक पेप ग्वार्डिओलाको वर्तमान क्लब म्यानचेस्टर सिटी र पूर्वक्लब बार्सिलोना युरोपियन च्याम्पियन्स लिग फुटबलको नकआउट चरण पुगेका छन् । समूहगत चरणको बुधबार राति भएको खेलमा बार्सिलोनाले सेल्टिकलाई २-० गोलले हरायो ।

जर्मन क्लब मोन्चेनग्ल्याडब्याचविरुद्ध उत्रिएको म्यान सिटी १-१ गोलको बराबरीमा रोकिए पनि अगाडि बढ्न सफल भयो । समूह ‘सी' मा पाँच खेलबाट १२ अंक जोडेको बार्सिलोना भने विजेता बन्दै अगाडि बढ्ने निश्चित भयो ।

समान खेलपछि आठ अंक भएको म्यान सिटी दोस्रो स्थानमा रहँदै उपविजेताका रूपमा नकआउट चरण पुग्ने पक्का भएको हो । तेस्रो स्थानमा रहेको मोन्चेनग्ल्याडब्याचको पाँच अंक छ । तीनवटै टोलीले अब एकएक खेल खेल्न बाँकी छ ।

मोन्चेनग्ल्याडब्याच प्रतियोगिताबाट बाहिरिए पनि युरोपा लिगका लागि भने छनोट भएको छ । सेल्टिकको मैदानमा भएको खेलमा बार्सिलोनाका दुवै गोल लियोनल मेसीले गरे । नेमारको पासमा २४ औं मिनेटमा टोलीलाई अग्रता दिलाएका मेसीले ५५ औं मिनेटमा पेनाल्टीमार्फत गोल थपेका थिए ।

मेसी जारी च्याम्पियन्स लिगमा नौ गोलसहित सर्वाधिक गोलकर्ताको सूचीमा शीर्ष स्थानमा छन् । दोस्रो स्थानमा रहेका पेरिस सेन्ट जर्मन (पीएसजी) का एडिन्सन काभानीको पाँच गोल छ ।

मेसी युरोपियन च्याम्पियन्स लिगको सर्वकालीन सर्वाधिक गोलकर्ताको सूचीमा दोस्रो स्थानमा छन् । शीर्ष स्थानमा रहेका रियल म्याड्रिडका क्रिस्टियानो रोनाल्डोभन्दा मेसी केवल तीन गोलले पछाडि छन् । रोनाल्डोको ९५ र मेसीको ९२ गोल छ ।

मोन्चेनग्ल्याडब्याचले म्यान सिटीविरुद्ध सुरुआती अग्रता लिए पनि त्यसलाई कायम राख्न सकेन । घरेलु मैदानमा उत्रिएको मोन्चेनग्ल्याडब्याचले राफेलमार्फत २३ औं मिनेटमा अग्रता लिएको थियो । म्यान सिटीले डेभिड सिल्भाको गोलमार्फत पहिलो हाफको इन्जुरी समयमै खेल बराबरीमा ल्याएको थियो ।

मोन्चेनग्ल्याडब्याच ५१ औं र म्यान सिटी ६३ औं मिनेटमा १० खेलाडीमा सीमित भएका थिए । म्यान सिटी लगातार चौथो पटक नकआउट चरण पुगेको हो । यसै सिजन म्यान सिटीमा आबद्ध भएका प्रशिक्षक ग्वार्डिओलाले सन् २००८ देखि चार वर्षको कार्यकालमा बार्सिलोनालाई दुई पटक युरोपियन च्याम्पियन बनाएका थिए ।

समूह ‘बी' अन्तर्गतको समीकरण भने रोमाञ्चक बनेको छ । उक्त समूहको बुधबार राति भएको खेलमा नापोली र डाइनामो किभले गोलरहित बराबरी तथा बेसिकटस र बेनफिकाले ३-३ गोलको बराबरी खेले । पाँच खेलपछि बेनफिका र नापोलीको समान पाँचपाँच अंक छ ।

बेसिकटसको सात अंक छ । बेसिकटसको मैदानमा भएको खेलमा बेनफिकाले ३-० गोलको अग्रता लिएर पनि त्यसलाई कायम राख्न सकेन । बेसिकटसका गोन्कालो ग्वेडेसले १० औं, नेल्सन सेमेडोले २५ औं र जुबोमिर फेजसाले ३१ औं मिनेटमा गोल गरे । बेनफिकाका लागि भने सेन्क टोसुनले ५८ औं, रिकार्डो क्वारिज्माले ८३ औं र भिनसेन्ट अबुबाकरले ८९ औं मिनेटमा गोल गरेका थिए ।

अन्य खेलमा साबिक उपविजेता एट्लेटिको म्याड्रिडले जित हात पार्‍यो भने पूर्व विजेता बायर्न म्युनिखले एफके रोस्टोभलाई ३-२ गोलले हरायो । एट्लेटिकोले पीएसभीलाई २-० गोलले पराजित गर्‍यो । आर्सनल र पेरिस सेन्ट जर्मन (पीएसजी) बीच २-२ गोलको बराबरी भयो ।

बायर्न, एट्लेटिको, आर्सनल र पीएसजी यसअघि नै नकआउट चरण पुगिसकेका छन् । समूह ‘ए' मा पाँच खेलपछि आर्सनल र पीएसजीको समान ११/११ अंक छ । तेस्रो स्थानमा रहेको लुडोगोरेट्सको दुई अंक छ ।

समूह ‘डी' मा पाँच खेलपछि १५ अंक जोडेको एट्लेटिको विजेता बन्ने पनि निश्चित छ । दोस्रो स्थानमा रहेको बायर्नको नौ अंक छ । तेस्रो स्थानमा आसीन रोस्टोभको चार अंक छ ।

प्रतियोगितामा लगातार पाँचौं जित हात पार्ने क्रममा घरेलु मैदानमा उत्रिएको एट्लेटिकोका लागि केभिन गामेरो र एन्टोइन ग्रिजम्यानले एकएक गोल गरे । ग्रिजम्यानको पासमा ५५ औं मिनेटमा गामेरोले घरेलु टोलीलाई अग्रता दिलाएका थिए । ग्रिजम्यानले ६६ औं मिनेटमा टोलीको अग्रता दोब्बर बनाए ।

एट्लेटिकोले घरेलु लिगमा लगातार दुई हार व्यहोरेपछि जित हात पारेको हो । आर्सनल र पीएसजीबीचको खेल रोमाञ्चक रह्यो । आर्सनलको मैदानमा भएको खेलमा पीएसजीले १८ औं मिनेटमा अग्रता लिएको थियो । पहिलो हाफको इन्जुरी समयमा ओलिभर गिरोडको पासमा आर्सनल बराबरीमा फर्किएको थियो ।

त्यसपछि आर्सनलले पीएसजीका मार्को भेराट्टीको पासमा ६० औं मिनेटमा अग्रता लियो । तर पीएसजीले पनि आर्सनलका खेलाडीको आत्मघाती गोलमा खेल बराबरीमा ल्यायो । आर्सनलका एलेक्स ल्वोबीबाट ७७ औं मिनेटमा आत्मघाती गोल भएको थियो । रोस्टोभले घरेलु मैदानमा बायर्नविरुद्ध ससक्त प्रदर्शन गर्‍यो ।

रोस्टोभका सर्दार एजमनले ४४ औं, दिमित्री पोलोजले ४९ औं र क्रिस्टियन नोबोवाले ६७ औं मिनेटमा गोल गरे । बायर्नका डगलस कोस्टाले ३५ औं र हुँवा बर्नाटले ५२ औं मिनेटमा गोल गरे । यो सिजन कमजोर प्रदर्शन गरिरहेको बायर्नले घरेलु लिगमा एक हार र एक बराबरीको नतिजापछि च्याम्पियन्स लिगमा यस्तो नतिजा निकालेको हो ।