विवाह गर्ने उमेर भएका युवायुवतीलाई यससम्बन्धी कौतुहल हुनु स्वाभाविक हो । तर सामाजिक रूपमा गाँसिने सम्बन्ध भएकाले विवाहका चुनौतीहरू पनि थुप्रै छन् । केही अविवाहित कलाकारसँग विनीता मरहट्टाले 'विवाहसँग कस्तो डर लाग्छ ? ' भनेर सोधेकी छन् ।
केकी अधिकारी, अभिनेत्री
विवाह भनेको हाई कमिटमेन्ट हो । एक्लै हुँदा त्यति कमिटेट हुँदैनौं । अहिले जिम्मेवारीहरू पूरा गरे पनि हुन्छ नगरे पनि खासै फरक पर्दैन जस्तो लाग्छ । तर विवाह पछि जिम्मेवारी पूरा गर्नैपर्छ । विवाह जीवनसाथीसँगको मात्र सम्बन्ध होइन यो परिवार जोडिने सम्बन्ध हो । सबै सम्बन्धप्रतिको जिम्मेवारी पूरा गर्नुपर्छ । अर्को जेनेरेसन अघि बढाउनुपर्छ । मैले यी सबै जिम्मेवारी पूरा गर्न सक्छु कि सक्दिनँ होला भनेर डर लाग्छ ।
कविराज लामा, चित्रकार
विवाह गर्ने समय भएकै हो । परिवारमा कुराकानी भइरहेको हुन्छ । प्रस्तावहरू आइरहन्छन् । जिम्मेवारी महसुस हुन्छ । अब गर्नुपर्ने बेला भयो जस्तो लाग्छ । विवाह एउटा एक्सपेरिमेन्ट हो । जिन्दगीभरि नै एकले अर्कालाई बुझ्न सकिँदैन । परपफेक्ट जीवनसाथी भनेर खोज्नु बेकार हो । भगवान्ले कसैको लागि परफेक्ट साथी बनाएकै हुँदैन । त्यो एक्जिस्ट नै हुँदैन ।
प्रविशा अधिकारी, गायिका
विवाह भन्ने बित्तिकै डर लाग्छ । उमेर त भएको हो । कुरा पनि आइराछ । तर हरेक मंसिर आउने बित्तिकै 'यो मंसिरमा होइन अर्को मंसिर कुर्ने कि' भन्ने छ । बुवा ममीसँगको लाइफबाट पूरै नयाँ परिवारमा, नयाँ कल्चरमा पुग्नुपर्छ । कसरी एडजस्ट गर्छु होला भनेर डर लाग्छ । मैले सबै जिम्मेवारी पूरा गर्न सक्छु कि सक्दिनँ होला, जीवनसाथी बुझ्नै खालको हुने हो कि होइन । यस्तै यस्तै कुराले विवाह सम्झँदै डर लाग्छ ।
अमृत ढुंगाना, अभिनेता
सिंगल लाइफमा आफ्नै मर्जीमा हिँडिरा हुन्छु । विवाहपछि त्यो केही हदसम्म हराउँछ कि जस्तो लाग्छ । अहिले सबै डिसिजन आफैंले गरिरहेको छु । पछि पार्टनरसँग सोधेर डिसिजन लिनुपर्छ । आफूलाई गर्न मन लागेको कुरामा उसको चाहना नहुन पनि सक्छ । आफूले चाहेको काम आफ्ने डिसिजनले गर्ने फ्रिडम हुँदैन । त्यही कुरादेखि डर लाग्छ । तर अहिले नै विवाहको विषयमा सोचिसकेको छैन । धेरै कुरा त दिमागमै आउँदैन ।
प्रतिक्रिया दिनुहोस !
