दिक्दारीको परिणाम 'बिजुली मेसिन'

युवा अवस्थाका नवीन अवाल । जीवनमा केही त गर्नैपर्छ भन्ने हुटहुटीले उनले भक्तपुरमा सानो 'बिजनेस' सुरु गरे । 'आम्दानीको सपना बोकेर थालेको बिजनेस लगानीमै चौपट भयो', अवालले भने, 'बत्ती नभई नचल्ने बिजनेस थियो । कहिले ब्याकप, कहिले इन्भर्टर जोड्नमै नाफाको साटो घाटा भयो ।'

अब के गर्ने त ? उनीसँग परिकल्पना गर्नसक्ने र त्यसलाई मूर्त रूप दिने कला थियो । कार्यथलोमा बसिरहँदा उनले सोचे, 'एउटा कथा लेख्छु ।' लेख्दै गए, एउटा कथा तयार भयो । 'बिजुली मेसिन' शीर्षकको त्यही कथामा आधारित भएर उनले एउटा चलचित्र बनाउने सपना बुने ।

मुलुकमा लोडसेडिङले भोगाएको पीडा, लोडसेडिङमुक्त बनाउन देखाइने सपना र बिजुली निकाल्न सकिने विकल्पको सम्मि श्रण गरेर उनले विज्ञानमा आधारित चलचित्र बनाइछाडे । 'आज म धेरै खुसी छु', अन्नपूर्णसँग कुरा गर्दै उनले भने, 'बत्ती नभएर दिक्दार बन्दाको अवस्थालाई चित्रण गर्छु भनेर लेखेको स्क्रिप्ट आज चलचित्र भएको छ ।'

आगामी १७ गते देशैभर प्रदर्शन हुन लागेको साइन्स विषयमा आधारित यो चलचित्रले लोडसेडिङको मार, हल्लाहरूलाई उपहास र आवाजबाट पनि विद्युत् निकाल्न सकिन्छ भन्ने परिकल्पना पस्किएको छ । नवीनकै निर्देशनमा बनेको चलचित्रमा ऊर्जा संकटले चौपट बनेको व्यक्ति, अर्थतन्त्र र मुलुकको कथा समेटिएको छ । यो हल्लाको देश हो तर त्यही आवाजको कम्पनबाट पनि बिजुली निकाल्न सकिन्छ भन्ने उपाय सुझाइएको उनले बताए ।

उसो त नवीन स्नातक पढ्दै गर्दा सन् २००८ मै चलचित्रसम्बन्धी चारमहिने कोर्स गरेका युवा हुन् । उनले 'बिजुली मेसिन' पहिलो फिल्म बनाए पनि काठमाडौं युनिभर्सिटीका विद्यार्थीका लागि सर्ट मुभी बनाउने काम गर्दै आएका थिए । उनले बनाएको 'वन पर्सन' शीर्षकको छोटो चलचित्र युट्युबमा चर्चित छ ।

देशको दुर्गतिको कारण लोडसेडिङ नै हो भन्ने लागेपछि उनले बिजुली मेसिन बनाए । त्यसका लागि नयाँ पुस्तका विषय बुझेकै कालाकारलाई उनले स्थान दिए । निर्माताका रूपमा ऋषभ आचार्य, दीपेन बस्नेत, सञ्जीव न्यौपाने र बिन्दु तिमल्सेना अगाडि सरेका छन् भने नवीनको परिकल्पनालाई मूर्त रूप दिने कोसिस अभिषेक सुवेदी, जीवन अधिकारी, रेलिजा श्रेष्ठले गरेका छन् ।

परिपक्व नायक राजेश हमाल प्रोफेसरको भूमिकामा छन् भने लक्ष्मी भुसाल, बुद्धि तामाङ, कमलमणि नेपाल लगायतले आवाजबाट बिजुली निकाल्ने विषयमा समर्थन जनाएका छन् ।