पाँच दलका नेताको एउटै धारणाः‘ मिलेर अघि बढौं'
बुटवलः संविधान संशोधनको पक्ष र विपक्षमा बहस भइरहेका बेला पाँच दलका नेताले देश र जनताका लागि मिलेर जानुपर्ने बताएका छन् । संविधान निर्माणमा जस्तो सम्झौता गरिएको थियो त्यस्तै सम्झौता गरेर अघि बढ्ने समय आएको उनीहरूले बताए ।
माओवादी केन्द्रका नेता तथा सांसद भक्तिप्रसाद पाण्डेको १३ दिनको तिथिमा बिहीबार रूपन्देहीको सैनामैनास्थित निवासमा भएको श्रद्धाञ्जलीसभामा नेताहरूले दलीय स्वार्थ त्यागेर अघि बढ्ने समय आएको बताए ।
कार्यक्रममा नयाँ शक्ति पार्टीका संयोजक बाबुराम भट्टराई, पूर्वसभामुख सुवास नेम्बाङ, माओवादी केन्द्रका सचिवालय सदस्य वर्षमान पुन, कांग्रेसका केन्द्रीय सदस्य चन्द्र भण्डारी, राष्ट्रिय जनमोर्चाका उपाध्यक्ष बद्रे आलम उपस्थित थिए ।
भट्टराईले संविधान संशोधनपछिको राजनीतिक निकासका लागि सबै दल सहमतिमा आउनुपर्ने बताए । ‘दलीय सहमतिबिना संविधान संशोधन भएमा समस्या बल्झिन्छ’, उनले भने ।
एमाले नेता नेम्बाङले संविधान निर्माणको बेला दलहरूले निकै ठूलो सम्झौता गरेको स्मरण गराउँदै सहमति र सम्झौता गर्ने बेला फेरि आएको बताए । उनले भने, ‘आफूले हस्ताक्षर गरेको संविधान कार्यान्वयन गर्नु सबैको दायित्व हो । यो दलहरू विभाजित भएर ध्रुवीकरण हुने समय होइन ।’
माओवादी केन्द्रका सचिवालय सदस्य पुनले संविधान संशोधनलाई दलको स्वार्थका रूपमा लिन नहुने बताए । देश र जनताका लागि दलहरू एक हुनुपर्ने भन्दै उनले संविधान कार्यान्वयन र निर्वाचन गर्ने समयमा पक्षविपक्ष हुनु नहुने बताए ।
कांग्रेसका केन्द्रीय सदस्य भण्डारीले सीमांकनका विषयमा पहिले भएका सहमति परिवर्तन गर्नका लागि जनताको राय लिन आवश्यक रहेको बताए । प्रदेश नम्बर ५ विभाजन गरिए ठूलो आन्दोलन हुनसक्ने भन्दै उनले सहमतिमा काम गर्नुपर्ने बताए ।