पोखराः केहीअघि कास्की फाइनान्ससँग मर्ज भएको कामना विकास बैंक अब बुटवलको सेवा विकास बैंकसँग गाभिने भएको छ । कामनाका अध्यक्ष राजेन्द्रनिधि कोइराला र सेवाका अध्यक्ष भीमप्रसाद तुलाचनले संस्था गाभ्ने सहमति पत्रमा हस्ताक्षर गरेका छन् ।
गाभिएपछि संस्थाको चुक्तापुँजी १ अर्ब ९ करोड रुपैयाँ पुग्दैछ । नयाँ बन्ने संस्थाको नाम कामना सेवा विकास बैंक रहने भएको छ । कामना यसअघि नै राष्ट्रियस्तरको विकास बैंक हो भने सेवाले भने १० जिल्लाको कार्यक्षेत्रमा सेवा दिँदै आएको थियो ।
गाभिएपछि बैंकको प्रमुख कार्यकारी अधिकृत (सीईओ) सेवामा त्यही जिम्मेवारीमा रहेका महेशप्रसाद काफ्लेले पाउने भएका छन् । कामनाका अध्यक्ष राजेन्द्रनिधि कोइरालालाई पनि पुरानै जिम्मेवारी दिने सहमति भएको छ ।
अहिले राजधानीबाहिरै रहेर केन्द्रीय कार्यालय चलाइरहेका संस्थाले काठमाडौंमा केन्द्रीय कार्यालय बनाउने भएका छन् । आउँदो चैतसम्ममा दुवै संस्था मिलेर एकीकृत कारोबार गर्ने तयारी रहेको कामनाका सीईओ तोयराज अधिकारीले बताएका छन् । मर्जपछिको संस्थामा अधिकारी डेपुटी सीईओ हुँदैछन् ।
मर्जपछि संस्थाको निक्षेप ११ अर्ब ५५ करोड रुपैयाँ र लगानी १० अर्ब ८४ करोड रुपैयाँ पुग्नेछ । कामनाले ३० प्रतिशत र सेवाले १ सय २० प्रतिशत हकप्रद सेयर निस्कासन गरेर पुँजीवृद्धि पनि गर्दैछन् ।
त्यसपछि भने चुक्तापुँजी २ अर्ब ६ करोड रुपैयाँ पुग्नेछ । २०७४ असार मसान्तसम्ममा २ अर्ब ५० करोड रुपैयाँ पुँजी सहजै पुग्ने उनले बताए ।
मर्जपछि बैंक शाखा ४० वटा, १२ एटिएम र २ सय ८४ कर्मचारी पुग्ने जानकारी पनि अधिकारीले दिए । दुवै बैंकका गरी १ लाख ५६ हजार ग्राहक पुग्नेछन् ।
प्रतिक्रिया दिनुहोस !
