सुत्केरीको मृत्युपछि कोसी अस्पतालमा तनाव
विराटनगरः सुत्केरीको मृत्यु भएको विषयलाई लिएर बुधबार विहानैदेखि विराटनगर स्थित कोसी अञ्चल अस्पताल तनावग्रस्त बनेको छ ।
कोसी अस्पतालमा सोमबार शल्यक्रिया गरेर बच्चा निकालिएकी विराटनगर १० हाटखोलाकी २१ वर्षीय कमला लुइँटेल अधिकारीको बुधरबार विहान धरानमा मृत्यु भएको थियो ।
कमलाका आफन्त अस्पताल विरुद्ध नाराजुलुस गर्दै विरोधमा उत्रदा स्थिति तनावपूर्ण बनेको हो । महिला तथा प्रसूति रोग विशेषज्ञ डा. मेलुना भुषाल नेत्रृत्वको चिकित्सक टोलीले कमलाको शल्यक्रिया गरेर बच्चा निकालेको थियो ।
शल्यक्रिया गरेर बच्चा निकालिए पनि बढी रक्तश्राव भएका कारण स्वास्थ्य अवस्था जटिल बन्दै गएपछि सुत्केरी युवतीलाई थप उपचारका लागि धरानस्थित बीपी कोइराला स्वास्थ्य विज्ञान प्रतिष्ठान पठाइएको थियो ।
उपचारका क्रममा बुधबार विहान कमलाको धरानमै मृत्यु भएको हो । चिकित्सकको लापरवाहीले मृत्यु भएको भन्दै कमलाका आफन्त विहानैदेखि विरोधमा उत्रिएका छन् ।
आफन्तले शल्यक्रियाका क्रममा लापरवाही गर्ने चिकित्सकलाई कारवाही हुनु पर्ने, मृतकबाट जन्मिएको छोरालाई शिक्षा दीक्षा र भरणपोषणको व्यवस्था अस्पतालले गर्नु पर्ने, पीडित परिवारलाई उचित क्षतिपूर्ति र किरिया खर्च दिनु पर्ने, आगामी दिनमा यस्ता घटना दोहोर्याउन नहुने, सर्वसाधारणको उपचारमा लापरवाही गर्न नहुने लगायतका माग राखेर नाराजुलुस गरिरहेका छन् ।
अस्पतालमा थप तनावको स्थिती उत्पन्न हुन नदिन ठूलो संख्यामा प्रहरी परिचालन गरिएको छ । समस्या समाधानका लागि भन्दै अस्पताल प्रशासन र पीडित पक्षबीच बार्ता जारी रहे पनि अहिले सम्म कुनै निस्कर्ष निस्कन सकेको छैन ।
अस्पतालका मेडिकल सुपरिटेन्डेन डा. रोशन पोखरेलले शल्यक्रियाका क्रममा चिकित्सकले लापरवाही गरे नगरेको विषयमा अनुसन्धान गरिने बताए । अप्रेसनपछि पोष्टअप वार्डमा लैजाँदा स्वास्थ्यकर्मीले ध्यान नदिंदा त्यहाँ रहेका फोहोरका कारण शरीरमा इन्फेक्सन भएर सुत्केरीको मृत्यु भएको हुन सक्ने डा. पोखरेलको भनाइ छ ।
प्रतिक्रिया दिनुहोस !
