समर्थकले गिज्याउँदै रोनाल्डोलाई ‘समलिंगी’ भनेपछि बार्सिलोना समस्यामा
काठमाडौंः घरेलु मैदानमा समर्थकहरुले सिट्टीमार्फत रियल मड्रिडका स्टार खेलाडी क्रिष्टियानो रोनाल्डोतर्फ संकेत गर्दै ‘समलिङ्गी’ सन्देश प्रवाह गर्ने धुन बजाएपछि बार्सिलोना समस्यामा परेको छ।
ला लिगा अन्तर्गत गएराति भएको एल क्लासिको भिडन्त बराबरीमा टुङ्गिएको खेलमा रोनाल्डालाई गिज्याउँदै बार्सिलोनाका समर्थकले (कम आउट अफ द क्लोजेस्ट) अर्थात ‘कोठीबाट बाहिर आउ’ भन्ने गीतको धुन बजाएका थिए।
ला लिगामा यस्ता गतिविधि प्रतिबन्धित छ। ला लिगाका प्रमुख जाभिएर टेबासले बार्सिलोनामाथि कडा कारबाही हुने बताएका छन्। बार्सिलोनामाथि प्रतिबन्ध समेत लाग्न सक्ने उनको भनाई छ।
यसअघि मड्रिड डर्बीमा रियल मड्रिडलाई जित दिलाउँदा ह्याट्रिक गरेका रोनाल्डोलाई एथ्लेटिको मड्रिडका कोकेले समलिंगी भनेका थिए। आफूलाई समलिंगी भनेपछि रोनाल्डोले कोकेलाई जवाफ दिँदै भनेका थिए,‘हो, म समलिंगी हुँ, तर धनी।’
उक्त खेलमा पनि एथ्लेटिको मड्रिडका समर्थहरुले समलिंगी सन्देश प्रवाह गर्ने गीतको धुन बजाएका थिए।
प्रतिक्रिया दिनुहोस !
