काठमाडौं: चिकित्साशास्त्र अध्ययन संस्थानका नवनियुक्त डिन प्राध्यापक डा.जगदीश अग्रवालले अप्ठ्रो परिस्थिति हुँदाहुँदै पनि आफूले राम्रो काम गरेर देखाउने दाबी गरेका छन् ।
डा.गोविन्द केसीको लामो संघर्षपछि शनिबार डिनमा नियुक्त भएका फिजिसियन तथा नसारोग विशेषज्ञ अग्रवालले आफ्नो संस्थान र मातहतका क्याम्पसको गुणस्तरीय शिक्षाका लागि विधिमा टेकेर काम गर्ने बताए ।
उनले आफ्नो नियुक्तिलाई लिएर केही समूहबाट असन्तुष्टि व्यक्त भए पनि त्यसको व्यवस्थापन गर्ने पनि बताए । 'डा.केसीको अडानमा मात्रै पनि म डिन भएको होइन, मेरो योग्यता तथा दक्षताको कारण पनि मलाई डिन बनाइएको हो', डा. अग्रवालले आइतबार अन्नपूर्णसँग भने, 'उहाँले संस्थानको शैक्षिक प्रणाली व्यवस्थित र स्तरीय बनाउन वरिष्ठताका आधारमा डिन नियुक्त हुनुपर्छ भन्नुभएको हो ।'
आफ्नो नियुक्ति प्रक्रियालाई लिएर विरोध जनाउनुको कुनै अर्थ नभएको उनले बताए ।
केसीका संस्थानसँग सम्बन्धित माग पूरा गर्ने प्रतिबद्धता पनि डा.अग्रवालले व्यक्त गरेका छन् । 'डा.केसीले संस्थानको गुणस्तरीय शिक्षामा आफूले राम्रो भूमिका खेल्न सक्छु भन्ने विश्वास गर्नुभएको छ । उहाँको यो विश्वास म टुट्न दिनेछैन', अग्रवालले भने, 'संस्थान बनाउन मलाई उहाँले डिन बनोस् भन्ने चाहनुभएको हो जसलाई नकारात्मक दृष्टिकोणबाट हेर्न मिल्दैन ।'
प्रतिक्रिया दिनुहोस !
