काठमाडौं: आफ्नो जन्मथलोलाई प्रवद्र्धन गर्न धरानमा बसेका इलामेहरुले 'धरानमा इलाम' कार्यक्रम सञ्चालन गर्न लागेका छन् । आगामी पुस ९ र १० गते हुने कार्यक्रममा इलामको भूगोल बाहेकको सम्पूर्ण परिचय धरानमा देखाउने लक्ष्यका साथ काम गरिरहेको कार्यक्रम आयोज समितिका अध्यक्ष कृष्ण शाहले जानकारी दिए ।
'भूगोलबाहेक इलामको शैक्षिक, सांस्कृतिक, राजनीति, उत्पादन, पर्यटन र इतिहास पनि झल्किने किसिमको तस्बिरको माध्यमबाट, दृश्यको माध्यमबाट हामी प्रस्तुत गर्छौ,' शाहले भने–'यो कार्यक्रमले इलामेबीचको एकताका साथै पर्यटकीय हिसावले व्यवसाय सञ्चालन गर्न सहयोग पुग्ने मेरो विश्वास छ ।'
दुई दिन सम्म सञ्चालन हुने कार्यक्रममा सांस्कृतिक कार्यक्रमका साथै विभिन्न स्टल राखेर इलामको जानकारी दिइने छ । स्टलमा इलामको १२ वटा गन्तव्य, बजारमा आइसकेका गन्तव्यहरु तथा लुकेर रहेका नयाँलगायत २० गन्तव्यको तस्बिर राख्नुका साथै होडिङ बोर्डमार्फत जानकारी गराइन्छ ।
त्यस्तै चिया, चिज, दुधलगायतका उत्पादनहरु प्रदर्शनी तथा बिक्री कक्षका रुपमा राखिने छ । इलाममा मात्रै रहेका लेप्चा, उनीहरुको संस्कृति, राई लिम्बुलगायत सबै किसिमको संस्कृतिलाई पर्दशन गरिने शाहले बताए ।
कार्यक्रमका लागि अहिलेसम्म सरकारी पक्षसँग कुनै सहयोग नलिएको भन्दै शाहले घुमफिर वर्ष घोषणा गरेको सरकारले स्थानीयले नै पर्यटन प्रवर्धनका लागि गरेका काममा सहयोग गर्नुपर्ने बताएका छन् ।
नीतिगत हिसाबमा आफूहरुलाई बाधा नपुर्याए पर्यटन व्यवसायलाई नेपालको पहिलो व्यवसाय बनाउन आफूहरु लागि पर्ने शाहको भनाई छ ।
प्रतिक्रिया दिनुहोस !
