पोखराः फेवा ताल किनार सेदी हाइटमा ३५ करोड रुपैयाँ लगानीमा इन्फिनिटी रिसोर्ट सञ्चालनमा आएको छ । युवा व्यवसायी विनोद तिमिल्सिनाले रिसोर्ट सञ्चालनमा ल्याएका हुन् ।
पोखरा एयरपोर्टबाट पाँच किलोमिटरको दुरीमा रहेको रिसोर्ट निर्माण सुरु भएको दुई वर्षपछि सञ्चालनमा आएको हो । पोखरा-पामे सडकको सेदी हाइटमा रहेको रिसोर्टबाट पश्चिममा फेवातालसँगै शान्ति स्तुपा र उत्तरमा सराङ्कोटको अवलोकन गर्न सकिन्छ ।
१२ रोपनी क्षेत्रफलमा रहेको रिसोर्टमा २२ डिलक्स र दुई सुइट गरी २४ कोठा छन् । डिलक्स रुममा एक रातको ७५ अमेरिकी डलर र सुइट रुमको एक सय ५० अमेरिकी डलर तोकिएको छ । आन्तरिक पर्यटकको लागि उक्त मूल्यमा ३५ प्रतिशत छुट हुने सञ्चालक तिमिल्सिनाले बताए । रिसोर्टमा ६० जना क्षमताको सेमिनार हल छ । रिसोर्ट परिसरमा दुई सय जनासम्मका लागि आउटडोर सेमिनार गर्न मिल्छ ।
स्वीमिङपुल र अत्याधुनिक सुविधा सम्पन्न कोठा रिसोर्टको अर्को आकर्षण हो । रिसोर्टको ७५ प्रतिशत कोठाबाट फेवातालको दृश्यावलोकन गर्न सकिन्छ ।
२० जनालाई रोजगारी दिएको रिसोर्ट एक महिनादेखि सञ्चालनमा आएको भएपनि विधिवत् उद्घाटन भने मंसिर २२ गते पूर्वप्रधानमन्त्री बाबुराम भट्टराईले गर्ने सञ्चालक तिमिल्सिनाले जानकारी दिए । उद्घाटनको एक महिनासम्मलाई रिसोर्टका सम्पूर्ण कोठामा ५० प्रतिशतसम्म छुट रहेको पनि उनले जनाए ।
भारतको गोवामा दुई वर्षको बारटेन्डर र ओमानमा तीन वर्ष रिसोर्ट म्यानेजरका रूपमा काम गरिसकेका तिमिल्सिनाले जागिरकै क्रममा रिसोर्ट सञ्चालन गर्ने योजना बनाएको खुलाए । उनले आफ्नो अनुभवलाई आफ्नै रिसोर्टमा प्रयोग गर्ने र यसमा आफू सफल हुनेमा ढुक्क रहेको समेत बताए ।
बाल उद्यान, बालबालिकाका लागि पौडी पोखरी र रिसोर्ट परिसरमा सुविधा सम्पन्न भिल्लाह निर्माण गर्ने, खेलकुद मैदान, स्पा तथा योग केन्द्र स्थापना गर्दै जाने र ह्याङ्गिङ कटेजको निर्माण गर्ने भावी योजना रहेको उनले सुनाए ।
प्रतिक्रिया दिनुहोस !
