काठमाडौंः आन्तरिक वायुसेवा सञ्चालक संघले हवाई भाडा घटाएका छन् । नेपाल आयल निगमले सोमबार हवाई भाडा घटाएपछि संघले मंगलबारदेखि नै लागू हुने गरी भाडा घटाएको हो ।
संघले दिएको जानकारी अनुसार काठमाडौंबाट बाहिर जाने र बाहिरी विमानस्थलबाट सञ्चालन हुने भाडासमेत ९० रुपैयाँदेखि तीन सय १० रुपैयाँसम्म घटाएको छ ।
संघका सदस्य तथा सिम्रिक एयरलाइन्सका बजार निर्देशक प्रज्वल थापाका अनुसार काठमाडौंबाट सबैभन्दा लामो दुरीको गन्तव्य धनगढीका लागि हवाई भाडा तीन सय १० रुपैयाँले घटाइएको छ ।
काठमाडौंबाट नजिकैको गन्तव्य मानिएको सिमराका लागि भने ९० रुपैयाँ घटाइएको छ । घटेको हवाई भाडा मंगलबारबाटै लागू भएको संघले जानकारी दिएको छ ।
वायुसेवा सञ्चालक संघले दिएको जानकारी अनुसार माउन्टेन फ्लाइटमा तीन सय रुपैयाँ भाडा घटेर नयाँ भाडादर आठ हजार पाँच सय २५ रुपैयाँ भएको छ ।
पोखराको लागि एक सय ३५ रुपैयाँ घटेर नयाँ भाडादर चार हजार १० रुपैयाँ भएको छ । विराटनगर एक सय ६५ रुपैयाँ घटेर नयाँ भाडादर पाँच हजार ३० रुपैयाँ भएको छ ।
नेपालगन्जको दुई सय ३५ रुपैयाँ घटेर नयाँ भाडादर सात हजार पाँच सय ७५, विराटनगरमा एक सय ८५ रुपैयाँ घटेर ५७ सय ५५ भएको छ । धनगढीको १० हजार एक सय रुपैयाँ भएको छ ।
भद्रपुर दुई सय २० रुपैयाँ घटेर सात हजार ३०, सिमरामा ९० रुपैयाँ घटेर २५ सय पाँच, जनकपुरमा एक सय २० रुपैयाँ घटेर ३४ सय १० रुपैयाँ भएको छ ।
भरतपुरमा एक सय पाँच रुपैयाँ घटेर २९ सय २० रुपैयाँ भएको छ भने तुम्लिङटारमा एक सय ६५ रुपैयाँ घटेर ४७ सय १५ रुपैयाँ नयाँ भाडादर कायम भएको थापाले जानकारी दिए । यो भाडादर काठमाडौं विमानस्थलाई आधार बनाएर तय भएको साधारण भाडादर भएको उनको भनाइ छ ।
प्रतिक्रिया दिनुहोस !
