हर्स्याङ खोलाबाट झरेको पहिरोले मनास्लु पदमार्ग अवरुद्ध, पहिरो खस्नेक्रम जारी
गोरखाः लापू गाविस वडा नम्बर तीन स्थित हस्र्याङ खोलाबाट झरेको पहिरोले मनास्लु पदमार्ग अवरुद्ध भएको छ । यो पदमार्ग अवरुद्ध भएपछि १३ गाविसको आवतजावत बन्द भएको छ भने मनास्लु पदमार्ग भएर हिँड्ने एक हजार भन्दा बढी खच्चर हिँड्न नसकेको खच्चड व्यवसायी समितिका सचिव हर्कबहादुर गुरुङले जानकारी दिए ।
पहिरो खस्नेक्रम अहिले पनि जारी छ । ठूलो आवाजका साथ पहिरो खसिरहेको स्थानीयहरुले बताएका छन् ।
मंगलबार दिउँसोदेखि गएको पहिरो नरोकिँदा स्थानीयबासी त्रसित भएका छन् । राति ठूलो आवाजका साथ पहिरो गएपछि आरुघाटका स्थानीयबासी रातरात घर छाडेर भागेका थिए ।
बुढीगण्डकी थुनिने खतरा
हस्र्याङ खोलाबाट झरेको पहिरो बुढीगण्डकीको सतहसम्म पुगेपछि स्थानीयबासी नदी थुनिने खतरामा पुगेको भन्दै त्रसित भएका छन् । तर, अहिले नदीमा पहिराको कुनै अवरोध नभएको प्रहरीले जनाएको छ ।
स्थानीयबासी त्रसित भएपनि अहिले आत्तिनु पर्ने अवस्था नरहेको र बुढीगण्डकी नदी नथुनिएको आरुघाट इलाका प्रहरी कार्यालयका प्रहरी निरीक्षक रविराज थपलियाले जानकारी दिए ।
प्रतिक्रिया दिनुहोस !
