काठमाडौं: परराष्ट्रमन्त्री डा.प्रकाश शरण महतले नेपालले शान्ति वार्ताबाटै द्वन्द्वको समाधानमा हासिल गरेको सफलता संसारकै लागि उदाहरण भएकोले यसबाट विश्वले नै सिक्नसक्ने बताएका छन् ।
इन्डोनेसियाको बालीमा बिहीबारदेखि सुरु बाली डेमोक्रेसी फोरमको नवौँ सम्मेलनलाई सम्बोधन गर्दै महतले भने, ‘संसारका अरु देशले पनि द्वन्द्व व्यवस्थापन र शान्ति स्थापनाका लागि नेपालबाट सिक्न सक्छन् ।’
विश्वका ९४ देशका विदेशमन्त्री, मन्त्री तथा प्रतिनिधिको सहभागिता रहेको सम्मेलनको उद्घाटन इन्डोनेसियाका राष्ट्रपति जोको विदोदो बिहीबार गरेका छन् । यस सम्मेलनको नारा (थिम) धर्म, प्रजातन्त्र र बहुलबाद राखिएको छ।
शान्ति र प्रजातन्त्रका लागि नेपालले विगत लामो समयदेखि गरेको संघर्षको उदाहरण दिँदै परराष्टमन्त्री महतले संघर्षले नेपाली नागरिकलाई पनि शान्त र सहनशील बन्न सिकाएको बताए ।
‘हामी संसारमा नै उदाहरण दिन मिल्ने गरी समावेशी प्रजातन्त्रको अभ्यास गरिरहेका छौँ, हामीले संविधानमा नै देशको संसद्मा ३३ प्रतिशत र देशका सबै स्थानीय तहमा ४० प्रतिशत महिला सहभागिताको सुनिश्चितता गरेका छौँ,’ महतले भने, ‘हाल नेपालमा राष्ट्रपति, संसदमा सभामुख र प्रधानन्यायाधीश पनि महिला हुनुहुन्छ ।’
नेपाल सधैं शान्तिपूर्ण सहअस्तित्व र धार्मिक तथा बहुसांस्कृतिक मान्यतामा विश्वास गर्छ भन्दै महतले भने, ‘प्रजातन्त्र, कानुनी शासन, बहुलवाद र शान्तिपूर्ण माध्यमबाट नै अन्तराष्ट्रिय क्षेत्रमा सहयोग र समन्वय कायम गर्न सकिन्छ भन्नेमा नेपालको विश्वास रहेको छ ।’
प्रतिक्रिया दिनुहोस !
