काठमाडौं: बेल्जियमा लागि नेपाली राजदूत लोक बहादुर थापाले त्यहाँका राजा फिलिपसमक्ष बिहीबार ओहदाको प्रमाणपत्र पेश गरेका छन् । ब्रसेल्सस्थित राजदरबारमा आयोजित बिशेष समारोहमा राजदूत थापाले ओहदाको प्रमाणपत्र बुझाएका हुन् ।
थापाले राजा फिलिपसँग संक्षिप्त कुराकानी गरेको त्यहाँस्थित नेपाली दूतावासले प्रेस विज्ञप्तिमा जनाएको छ । राजा फिलिपले थापालाई कार्यकाल सफलताको शुभकामना र बधाई दिएका थिए । थापाको कार्यकाल दुई देशबीचको संबन्ध विस्तारमा फलदायी हुने विश्वास फिलिपले लिएका थिए ।
फिलिपले आफू राजकुमार हुंदा सन् १९९८ मा नेपाल भ्रमण गरेको स्मरण गरेका थिए । त्यसयता नेपालको राजनीतिक, आर्थिक, सांस्कृतिक र सामाजिक परिस्थितीमा महत्वपूर्ण परिवर्तन आइसकेको राजाले बताएको दूतावासले विज्ञप्तिमा जनाएको छ ।
सो अवसरमा राजदूत थापाले राष्ट्रपति विद्यादेवी भण्डारीले फिलिपलाई पठाएको सन्देश हस्तान्तरण गरे । थापाले आफ्नो कार्यकालमा नेपाल र बेल्जियमबीचको सम्बन्धलाई अझै सुदृढ गरी नयां उचाइमा पुर्याउन आफूले दृढ भएर काम गर्ने राजा समक्ष बताए ।
सन् १९९२ मा बेल्जियममा नेपालको आवासीय दूतावास स्थापना भएयता थापा छैठौँ राजदूत हुन् ।
प्रतिक्रिया दिनुहोस !
