चीनलार्इ परमाणु हतियार बनाउन सुझाव

बेइजिङः चीनको कम्युनिस्ट पार्टी समर्थित पत्रिका ‘ग्लोबल टाइम्स'ले चीनले सैन्य खर्च बढाउनुपर्ने र परमाणु हतियार वृद्धि गर्नुपर्ने बताएको छ । अमेरिकी राष्ट्रपतिमा डोनाल्ड ट्रम्प विजयी भएकाले यस्तो गर्नुपर्ने आफ्नो सम्पादकीयमा उल्लेख गरेको छ ।

ट्रम्पले चीनलाई एकल्याउने कोसिस गरिरहेकाले राष्ट्रिय स्वार्थका लागि रणनीतिक परमाणु हतियार बनाउन आवश्यक भएको सुझाव दिएको छ । चीनले डिएफ–४१ अन्तरमहादेशीय ब्यालिस्टिक क्षेप्यास्त्र तैनाथ गर्नुपर्नेमा जोड दिएको छ । अंग्रेजी र चिनियाँ दुवै भाषामा प्रकाशित लेखमा भनिएको छ, ‘सन् २०१७ मा चीनले सैन्य खर्च निकै बढाउनु आवश्यक छ ।'

‘ग्लोबल टाइम्स' सत्तारूढ कम्युनिस्ट पार्टी निकट पत्रिका हो । सम्पादकीयमा उल्लेख छ, ‘हामी ताइवानका विषयलाई लिएर पनि सैन्य रूपले उच्चस्तरीय हुनु आवश्यक छ । यसबाट स्वतन्त्र ताइवानको माग गर्नेलाई कारबाही गर्न सकिनेछ । दक्षिण चीन सागरमा अमेरिकाको भड्काउपूर्ण व्यवहारबाट सावधान हुन सहज हुनेछ ।'

यसअघि ट्रम्पले सुरक्षाका विषयमा पैसा लिनुपर्ने बताएका थिए । यदि अमेरिकाले कसैको सुरक्षा गर्छ भने त्यसको सट्टा रकम भुक्तानी गर्नुपर्ने उनले बताएका थिए । उक्त पत्रिकामा ‘चीनले ट्रम्पलाई पैसा पनि नदिने र त्यसको साटो उक्त रकम परमाणु हतियार बनाउन खर्च गर्ने' उनको भनाइ छ । चीनले आफ्नो अन्तरमहाद्वीपीय ब्यलिस्टिक मिसाइल डिएफ—४१ तैनाथ गर्नुपर्ने उनले स्पष्ट पारेका छन् । यो सातामात्रै ट्रम्पले दुईपटक चीनलाई भड्काउने खालका प्रतिक्रिया दिइसकेका छन् ।

त्यसकै प्रत्युत्तरमा चीनले पनि यस्ता विचार प्रकाशित गर्न थालेको छ । चुनाव जितेपछि ट्रम्पले ताइवानी राष्ट्रपतिलाई फोन गरेका थिए । यसको चीनले कडा विरोध गरेको थियो । चिनियाँ विदेशमन्त्री वाङ यीले यस्तो व्यवहार नगर्न अमेरिकालाई चेतावनी दिएका थिए ।

अमेरिकाले ‘एक चीन' नीतिमा प्रतिबद्धता जनाइसकेकाले यस्ता गतिविधि गर्न नहुने चीनको दाबी थियो । चीनले ताइवानलाई आफ्नो भूभाग ठान्छ । चिनियाँ सञ्चारमाध्यले ट्रम्पलाई कूटनीतिमा अनुभव नभएको भन्दै आलोचना गर्दै आएका छन् । कुनै पन पक्षले एक चीनको नीतिविरुद्ध कार्य गरे त्यसको बदला लिने पनि चीनको स्पष्टोक्ति छ । आँखाको बदला आँखा नीति अँगाल्न चीन बाध्य हुने उनको चेतावनी थियो ।

यसअघि ट्रम्पले ट्विट गर्दै चीनप्रति आक्रोश व्यक्त गरेका थिए । आफ्नो मुद्राको वास्तविक मूल्यांकन नगरेर चीनले अमेरिकी व्यापारलाई ध्वस्त पारेको ट्रम्पको आरोप थियो । चीनले अमेरिकालाई नसोधेर अमेरिकी कम्पनीलाई कमजोर बनाएको भन्दै आक्रोश पोखेका थिए । अन्तर्राष्ट्रिय नियम उल्लंघन गर्दै चीनले दक्षिण चीन सागरमा सैनिक गतिविधि बढाएको ट्रम्पको भनाइ थियो ।