सोलः दक्षिण कोरियाकी राष्ट्रपति पार्क ग्युन हायविरुद्धको महाभियोग प्रस्ताव पारित नभएमा यहाँको राष्ट्रियसभाको सबभन्दा ठूलो प्रतिपक्षी दलका सबै सांसदहरूले राजीनामा दिने भएका छन् ।
राष्ट्रियसभाको सबभन्दा ठूलो प्रतिपक्षी दल-मिन्जु पार्टीका संसदीय नेता (फ्लोर लिडर) ऊ साङहोले राष्ट्रपतिविरुद्ध लगाइएको महाभियोग प्रस्ताव संसद्बाट पारित नभएमा आफ्ना पार्टीका सबै सांसदहरूलाई राजीनामा दिनका लागि बाध्यात्मक आदेश (ह्विप) जारी भएको जानकारी दिएका छन् । यसका साथै महाभियोग प्रस्ताव पारित नभएमा सबै विधायकले पद त्याग गर्ने विषयमा पार्टीका सबैजसो वरिष्ठ नेता सहमत भइसकेको पनि उनले जानकारी दिए ।
सबै सांसदले पार्टी नेतृत्वसमक्ष एकमुष्ट संयुक्त राजीनामा गर्नुअघि शुक्रबार नै एक संकटकालीन बैठक बस्ने पनि दक्षिण कोरियाली समाचार समिति-योन्हापलाई बताइएको छ । दक्षिण कोरियाली संसद्मा ३ सयजना विधायक रहेका छन् । महाभियोग प्रस्ताव पारित हुन कम्तीमा दुई तिहाइ मतको आवश्यकता पर्छ । उक्त प्रस्तावउपर आगामी शुक्रबार मतदान हुने कार्यक्रम रहेको छ ।
त्यसैगरी महाभियोग प्रस्ताव पारित नभएमा सबै विधायकले एकैपटक संयुक्त राजीनामा गर्ने सम्बन्धमा राष्ट्रियसभाको अर्को विपक्षी दल-पिपुल्स पार्टीले पनि हस्ताक्षर संकलन कार्यलाई तीव्रता दिएको छ ।
संसद्का विपक्षी दल र स्वतन्त्र सांसदहरूले सो महाभियोग प्रस्ताव गत शनिबार औपचारिक रूपमै दर्ता गराएका थिए ।
वर्तमान राष्ट्रपति पार्कको दल-साएनुरी पार्टीसँग एक सय अठ्ठाइस सांसदहरू छन् । महाभियोग प्रस्तावको भाग्य र भविष्य सत्तारुढ दल - साएनुरी पार्टीका २८ जना सांसदहरूसँग जोडिएको छ ।
पार्टीले जारी गरेको ह्विप अटेर गरी साएनुरी पार्टीका २८ जना सांसदले महाभियोग प्रस्तावको पक्षमा मतदान गरे भने मात्र दुई तिहाइ मत पुगी उक्त प्रस्ताव पारित हुन्छ । अन्यथा महाभियोग प्रस्ताव बीचैमा तुहिने जानकारी दिइएको छ ।
पार्कको भ्रष्टाचार काण्डलाई लिएर विगत दुई महिनादेखि विशाल विरोध प्रदर्शन भएका थिए । कोरियालीहरूले प्रदर्शन गरी राष्ट्रपति पार्कलाई पदबाट हटाउने र उनीमाथि लागेको अनियमिततासम्बन्धी आरोपमा पक्राउ गर्नुपर्ने माग गर्दै विरोध गरेका थिए ।
विपक्षी दलले भ्रष्टाचारप्रति उदासीन रहेको भन्दै कोरियाली नागरिकले सभासद्हरूको आलोचना गरेका थिए । विशाल प्रदर्शन हुन थालेपछि विपक्षी दल राष्ट्रपतिविरुद्ध महाभियोग लगाउन राजी भएका थिए । चौसठ्ठी वर्षीया पार्कले आफ्ना साथीसँग मिलेर राज्यशक्तिको दुरुपयोग र जालसाजी गरेको आरोप लगाइएको छ ।
प्रतिक्रिया दिनुहोस !
