काठमाडौः नेपाल रेडक्रस सोसाइटीले विश्व विपद् प्रतिवेदन २०१६ सार्वजनिक गरेको छ । उक्त प्रतिवेदन अनुसार सन् २०१५ मा विश्वका हरेक १३ जनामध्ये एकले शरणार्थीका रूपमा शरण खोज्दै विस्थापित हुने अवस्थामा पुगेका थिए ।
सन् २०१५ हालसम्मकै सबैभन्दा तातो वर्षका रूपमा रह्यो । प्रतिवेदनले विपद् पूर्वतयारीमा थप लगानी गर्न विश्वलाई आह्वान गरेको छ । नेपाल रेडक्रस सोसाइटी केन्द्रीय कार्यालयमा आयोजित कार्यक्रममा नेपाल रेडक्रस सोसाइटीका अध्यक्ष सञ्जिव थापा, रेडक्रसको अन्तर्राष्ट्रिय महासंघका नेपाल प्रमुख म्याक्स स्यान्टनर र नेपाल सरकार गृह मन्त्रालयका सहसचिव कृष्ण राउतले सम्युक्त रूपमा प्रतिवेदन सार्वजनिक गरेको सोसाइटीका सञ्चार प्रमुख दिव्यराज पौडेलले बताए ।
यस वर्षको प्रतिवेदनले उत्थानशीलतालाई जोड दिएको छ भने नेपालमा सञ्चालित विपद् पूर्वतयारी गतिविधिलाई विश्व प्रतिवेदनमा समावेस गरिएको छ । प्रतिवेदनका अनुसार ६ करोड ५३ लाख मानिस सन् २०१५ मा आफ्नो मुलुकबाट अन्य देशका लागि विस्थापित भएका थिए भने चार करोडभन्दा बढी मानिस आफ्नै देशभित्र संघर्ष तथा हिंसाले स्थानान्तरण भएका थिए ।
प्रतिवेदन सार्वजनिकका क्रममा नेपालमा भूकम्प पछिको १८ महिनाको अवधिमा पुनर्निमार्णका विषयमा भूकम्प पुनर्निर्माण कार्यक्रम प्रमुख उमेश ढकाल र विश्व विपद् प्रतिवेदनका विषयमा नेपाल रेडक्रसका अन्तर्राष्ट्रिय महासंघका प्रमुख स्यान्टनरले प्रस्तुति दिएका थिए ।
कार्यक्रममा रेडक्रस अभियानका तीन वटै अंगका प्रमुख तथा प्रतिनिधि, नेपाल सरकार गृह मन्त्रालय एवं स्थानीय विकास मन्त्रालयका प्रतिनिधि तथा विभिन्न साझेदार निकायका प्रतिनिधिको सहभागिता थियो ।
प्रतिक्रिया दिनुहोस !
