दक्षिण कोरियाको सांसद्मा महाअभियोग प्रस्ताव पारित: राष्ट्रपति पदमुक्त
मंसिर २४, २०७३ शुक्रबार १४:५१:०
एजेन्सीः दक्षिण कोरियाको सांसद्मा महाअभियोग प्रस्ताव पास भएसँगै त्यहाँकी राष्ट्रपति पार्क गियुन हाय पदमुक्त भएकी छिन्। भष्टाचारको आरोप राष्ट्रपतिविरुद्ध लागेको महाअभियोगको प्रस्ताव शुक्रबारसांसद्ले पारित गरेको हो ।
त्यहाँको सांसद्को मतदानमा २३४ ले महाअभियोगको पक्षमा मत दिएका छन् भने उनको पक्षमा ५६ भोट परेको अन्तराष्ट्रिय सञ्चार माध्यमले जनाएका छन् ।
बिहीबार मात्र राष्ट्रपति पार्क ग्युन हायविरुद्धको महाभियोग प्रस्ताव पारित नभएमा यहाँको राष्ट्रियसभाको सबभन्दा ठूलो प्रतिपक्षी दलका सबै सांसदहरूले राजीनामा दिने घोषणा गरेका थिए ।
राष्ट्रियसभाको सबभन्दा ठूलो प्रतिपक्षी दल मिन्जु पार्टीका संसदीय नेता (फ्लोर लिडर) ऊ साङहोले राष्ट्रपतिविरुद्ध लगाइएको महाभियोग प्रस्ताव संसद्बाट पारित नभएमा आफ्ना पार्टीका सबै सांसदहरूलाई राजीनामा दिनका लागि बाध्यात्मक आदेश नै दिएका थिए ।
दक्षिण कोरियाको संसद्का विपक्षी दल र स्वतन्त्र सांसदहरूले महाभियोग प्रस्ताव गत शनिबार औपचारिक रूपमै दर्ता गराएका थिए ।
पार्कको भ्रष्टाचार काण्डलाई लिएर विगत दुई महिनादेखि विशाल विरोध प्रदर्शन भएका थिए । कोरियालीहरूले प्रदर्शन गरी राष्ट्रपति पार्कलाई पदबाट हटाउने र उनीमाथि लागेको अनियमिततासम्बन्धी आरोपमा पक्राउ गर्नुपर्ने माग गर्दै विरोध गरेका थिए ।
विपक्षी दलले भ्रष्टाचारप्रति उदासीन रहेको भन्दै कोरियाली नागरिकले सभासद्हरूको आलोचना गरेका थिए । विशाल प्रदर्शन हुन थालेपछि विपक्षी दल राष्ट्रपतिविरुद्ध महाभियोग लगाउन राजी भएका थिए । चौसठ्ठी वर्षीया पार्कले आफ्ना साथीसँग मिलेर राज्यशक्तिको दुरुपयोग र जालसाजी गरेको आरोप लगाइएको छ ।
प्रतिक्रिया दिनुहोस !
