आमा पहिलो, छोरी दोस्रो

राजविराजः सातौं राष्ट्रिय खेलकुद प्रतियोगिताका लागि राजविराजमा शुक्रबारदेखि सुरु भएको पूर्वाञ्चल क्षेत्रीय भारत्तोलन प्रतियोगितामा महिलातर्फ आमा र छोरीले उत्कृष्ट प्रदर्शन गरेका छन् । प्रतियोगितामा सप्तरीबाट ६३ केजी तौलसमूहमा सहभागी ३२ वर्षीया शान्ति चौधरीले एक सय ३० केजी तौल उचालेर प्रथम स्थान हासिल गरेकी हुन् । यसैगरी ४८ केजी तौल समूहमा भने उनकी १६ वर्षीया छोरी पल्लवी चौधरी ४९ केजी तौल उठाएर दोस्रो भइन् ।

महिलातर्फको सातवटा तौल समूहमा भएको छनोट प्रतियोगितामा ४८ केजी तौल समूहमा ७५ केजी भार उठाएर मोरङकी मनीषा चौधरी प्रथम र ५३ केजी तौल समूहमा ७७ केजी भार उठाएर सप्तरीकी सरस्वती चौधरी प्रथम भएकी छन् । ५८ केजी तौल समूहमा सिरहाकी सिर्जना चौधरी र ६९ केजी तौल समूहमा सिरहाकै पुष्पा चौधरी पहिलो भए ।

यसैगरी ७५ केजी तौल समूहमा सिरहाकै कान्ता भुजेल र ७५ केजीभन्दा माथिको तौल समूहमा सोही जिल्लाकी मनीता चौधरी प्रथम भई सातौं राष्ट्रिय खेलकुद प्रतियोगिताका लागि छनोट भए । पुरुषतर्फको खेल भने जारी रहेकाले शनिबारमात्रै अन्तिम परिणाम आउने भारोत्तोलनका वरिष्ठ प्रशिक्षक तिलक राउतले जानकारी दिए ।

जिल्ला खेलकुद विकास समिति सप्तरीको संयोजनमा भइरहेको उक्त प्रतियोगितामा पूर्वाञ्चलका ६ जिल्लाका ९५ जना खेलाडी सहभागी छन् ।