एन्फाको जवाफ थ्रीस्टारलाई अमान्य
![एन्फाको जवाफ थ्रीस्टारलाई अमान्य](https://annapurnapost.prixacdn.net/media/albums/three-star-club-584d07438612d4.14343081_XZ8KvwRK3w.jpg)
काठमाडौं : रुस्लान थ्रीस्टार क्लबले एएफसी कप २०१७ को प्ले अफ खेलमा आफ्नो सहभागिता अनिश्चित बनेको भन्दै न्यायका लागि जस्तोसुकै कदम चाल्ने जनाएको छ । थ्रीस्टारले पहिलो चरणमा सहभागी भई छनोट भएको टोलीलाई दोस्रो चरणमा सहभागिता गराउने काममा एन्फाकै त्रुटि भएको ठहर गर्दै कानुनी उपचार खोल्ने जनाएको हो ।
थ्रीस्टारका महासचिव सञ्जीव शिल्पकारले एन्फाको लापरबाहीले क्लबको लगानी र प्रतिष्ठामा आघात पुगेको बताए । ‘एन्फाले हामीलाई शुक्रबार पठाएको पत्र आफैंमा गैरजिम्मेवार छ । चारपटक एएफसीबाट आएको पत्रलाई बेवास्ता गरिनु आफैंमा लज्जास्पद विषय हो । एन्फाले हामीलाई पत्रमार्फत पठाएको जवाफमा एएफसीले नेपालको सहभागिता भनेको र कुन क्लब भनेर उल्लेख नगरेका कारण एन्फा सचिवालयबाट भूलवश त्रुटि भएको र एएफसी कपमा थ्रीस्टारको नाम छुटेको भन्ने उल्लेख छ’, शिल्पकारले भने ।
शिल्पकारले एन्फाको जवाफ थ्रीस्टारका लागि मान्य नहुने पनि बताए । ‘एन्फाको गल्ती आफैं गर्ने र पत्रमार्फत भूलवश त्रुटि भन्दै पन्छिने काम गर्दा क्लबले फुटबलमा गरेको लगानी बालुवामा पानीजस्तो भएको छ । एन्फाले छानबिनका लागि समिति बनाए पनि क्लब १५ दिनसम्म त्यत्तिकै बस्नेछैन । हामी अब न्यायका लागि जानेछौं’, शिल्पकारले भने । थ्रीस्टारले मंगोलियामा भएको पहिलो चरणको छनोट खेलमा मात्र ६४ लाख रुपैयाँ खर्च गरेको थियो । यसका लागि एएफसीबाट २० हजार अमेरिकी डलर र एन्फाबाट १० लाख रुपैयाँ सहयोग पाएको थियो ।
थ्रीस्टारका कप्तान विक्रम लामाले एएफसी कपकै लागि क्लब र खेलाडीले ६ महिनादेखि निरन्तर तयारी गरेकाले दोस्रो चरणमा खेल्न नपाउँदा दुःख लागेको बताए । ‘कुनै पनि खेलाडीले अन्तर्राष्ट्रिय स्तरको खेलमा सहभागिता जनाउन नपाउँदा खिन्न लाग्छ । अझ हामीले त धेरै ठूलो मेहनत गरेका थियौं । क्लब र खेलाडीको लगानी यसमा धेरै थियो । यस प्रतियोगिताका कारण थ्रीस्टारका खेलाडीले कुनै पनि खेलमा भाग लिएका थिएनन्’, लामाले भने । उनले यस्तो गल्तीले सबै खेलाडीलाई निराश बनाएको बताए ।
एन्फाको अध्यक्ष पदमा हालै पराजित भएका कर्माछिरिङ शेर्पाले एन्फा पदाधिकारीको लापरबाहीको पराकास्टाका कारण थ्रीस्टारको मात्र नभएर सिंगो नेपाली फुटबलको बेइज्जत भएको बताए । ‘एन्फाले झारा टार्नका लागि छानबिन समिति बनाएको छ । एन्फाकै पदाधिकारी बसेर गर्ने छानबिन कस्तो होला । गल्ती आफैं गर्ने, छानबिन पनि आफैं गर्ने यो कस्तो विडम्बना’, शेर्पाले भने । उनले यस घटनाले क्लब फुटबलको भविष्य अन्धकार रहेको भन्दै छानबिनका लागि नेपाल सरकारको मातहतमा छुट्टै समिति बनाइनुपर्ने पनि बताए ।
एन्फा कार्यसमितिको शुक्रबार नै बसेको बैठकले थ्रीस्टारले एएफसी कप प्ले अफ खेल्न नपाउनुमा आफ्नो कमजोरी भइसकेको स्वीकार गरेको थियो । घटनालाई मत्थर गर्न एन्फाले शुक्रबार नै मनोनीत भएका उपाध्यक्ष वीरबहादुर खड्काको संयोजकत्वमा तीन सदस्यीय समिति गठन गरेको छ । समितिमा एन्फा सदस्य रमेश रायमाझी र एन्फाका विकास निर्देशक सञ्जीव मि श्र सदस्य छन् । समितिले १५ दिनभित्र छानबिन गरी प्रतिवेदन बुझाउने पनि एन्फाले जनाएको छ ।
मंगोलियामा गत अगस्टमा एएफसी कपका लागि भएको छनोट खेलबाट नेपालको लिग विजेता रुस्लान थ्रीस्टार क्लब एएफसी कप प्ले अफका लागि छनोट भएको थियो । थ्रीस्टार क्लबले प्ले अफ छनोटअन्तर्गत समूह ‘बी’बाट प्रतिस्पर्धा गरेको थियो । थ्रीस्टार समूह विजेता बन्दै प्ले अफका लागि छानिएको थियो । तीन टोली सम्मिलित छनोटको पहिलो खेलमा थ्रीस्टारले इर्चिमलाई २–० गोलले हराएको थियो । थ्रीस्टार दोस्रो खेलमा नागावोर्लडसँग १–१ गोलको बराबरीमा रोकिएको थियो ।
तर दोस्रो चरणका लागि एएफसीले बिहीबार सार्वजनिक गरेको सूचीमा नेपालको थ्रीस्टारको नाम छैन । एएफसीले सार्वजनिक गरेको दक्षिण एसियाली राष्ट्रको सूचीमा भारत, माल्दिभ्स, बंगलादेश, भुटान र श्रीलंकाको नाम भने छ । एएफसीले सहभागी देश र टोलीको समूह विभाजन तथा खेलस्थल डिसेम्बर १३ मा तोक्नेछ ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)