सम्माननीय प्रधानमन्त्रीज्यू सर्वप्रथम तपाईंलाई जन्मदिनको शुभकामना । तपाई सञ्चै हुनुहुन्छ होला । मेरो कामना पनि त्यही हो । जन्मदिनमा तपाईंको सुस्वास्थ्यको कामना गर्दछु । तर, हामी टुक्राटुक्रा भएर बाँचेका छौँ । तपाईले हाम्रो एउटा शरीरलाई वालुवाटारमा बसेर टुक्राटुक्रा बनाउनु भएको छ । त्यसैले टुक्रटुक्रा शरीर लिएर हामी छट्पटाइरहेका छौँ । टुक्राटुक्रा शरीरको छट्पटाहट शब्दमा कसरी व्यक्त गरौँ ?
मेरो पीडालाई तपाईंको दिमागले एक एमाले कार्यकर्ताको आक्रोश मात्र ठान्छ होला तर, यो एमाले कार्यकर्ताको नभएर आम प्रदेश नम्बर ५ का जनताको पीडा हो । किनभने संविधान संशोधन प्रस्ताव व्यवस्थापिका संसदमा दर्ता भएपछि प्रदेश नम्बर ५ का सबै जनता पीडामा छन् । तर, तपाईले भने सबै नागरिकलाई एमालेको समर्थक र कार्यकर्ता भन्दा हाम्रो मन कटक्क दुख्छ ।
प्रधानमन्त्रीज्यू तपाईले ५ नम्बर प्रदशको स्वास्थ्यलाई बिरामी नहुँदै शल्यक्रिया गर्ने प्रस्तव गर्नुभयो । यो गलत निर्णयले हामीलाई जिन्दगीभर निको नहुने चोट लागेको छ ।
आज १२ दिन भैसक्यो हामीले सडकलाई बस्ती बनाएरका छौँ । तर, तपाई महलमा आरामले निदाउनु भएको होला ? म एउटा प्रदेश नम्बर ५ अन्तर्गतको गुल्मीमा जन्मिएकी छोरी हुँ । पहाडलाई माइती बनाएर मधेसलाई कर्मघर बनाउने इच्छा राख्छु । तर, तपाईले मधेस छिर्नै नपाउने खालको प्रस्ताव दर्ता गर्नुभएको छ। अब जवाफ चाहियो प्रधानमन्त्रीज्यू बर्षोदेखी चलिआएको हाम्रो वैवाहिक सम्बन्ध पनि अब प्रादेशिक हुने भयो होइन ?
११ दिनदेखि जनता भोकभोकै सडकमा छन् । तर, तपाई आकाशमा सुरक्षित यात्रा गर्नुहुन्छ । हाम्रो पीडालाई आकाश बाटै हेरेर रमाउँदै सुदरपश्चिम पुग्नुहुन्छ । अनि भन्नुहुन्छ, ‘मेरो सरकार रहुञ्जेल संशोधन प्रस्ताव फिर्ता हुदैन ।’
यो तपाईंको अडान सुनेपछि मलाई केही प्रश्न गर्न मन लागेको छ । यो अडानले जनतालाई दुख्छ भने तपाईंलाई किन दुख्दैन् ? के तपाई जन्मिदै पार्टीगत नेता भएर जन्मिनुभएको थियो, हो ? नेता हुनुभन्दा पहिला तपाईं नागरिक हुनुहुन्थ्यो होइन ? अनि आज ति आम नागरिकको पीडालाई कुर्सीमा पुगेर बिर्सन मिल्छ र ?
हामी लुम्बिनीवासी वर्षोदेखि मिलेर बसेका छाँै । हाम्रो रहनसहन, संस्कृति र बसोवास अञ्चलभित्रै सीमित छ । न मधेशका जनतालाई टुक्राएकोमा खुसी छ, न हामी पहाडमा बस्ने जनताका लागि ? के जनताको भावना भन्दा केही सीमित व्यक्तिको इच्छा पूरा गर्ने तपाईको प्रस्ताव स्वीकार्य हुनसक्छ ?
प्रधानमन्त्रीज्यू के त्यसो भए तपाई मधेशी मोर्चाको मात्रै प्रधानमन्त्री हो ? हामी मधेसका नेपाली जनतालाई सम्मान गर्छौं र मधेसका नेतालाई यो पनि आग्रह गछौँ सीमित क्षेत्रको नेता मात्रै होइन नेपालीको असल नेता बन्नुहोस् । सँगै आम नेपालीको भावनालाई कदर गर्न सक्नुहोस् । अनि नेतृत्वमा पुगरे देशको रक्षा गर्ने हिम्मत गर्नुहोस् । तपाईंहरुलाई शुभकामना छ ।
यदि हैन भने आज ११ दिनसम्म आन्दोलित नागरिकको भावनालाई कदर किन गर्नुहुन्न ? मैले सुन्ने गरेकी छु, तपाईं भन्दै हुनुहुन्छ, ‘बुटवलमा मात्रै आन्दोलन हो । पहाडका जिल्लामा आन्दोलन छैन ।’
के तपाईंलाई दुई चारजना जनताको मृत्युको खबर नसुनेसम्म आन्दोलन भएको थाहा हुँदैन हो ? होइन भने किन हाम्रो आन्दोलन देख्नु हुन्न ? हुन त तपाईंकै नेतृत्वमा दुई चार जना मात्र होइन हजारौँ नेपाली आमाका छोराछोरी सहिद भएका छन् । शान्तिपूर्ण आन्दोलनको समाचारले तपाईंलाई नछुन सक्छ । तर, यहाँ जनता ११ दिनदेखिको आन्दोलनले भोकभोकै मर्ने बेला भएको छ । यो कुरा तपाईंले थाहा नपाएर कसले थाहा पाउने ?
चाहे जसको सरकारले गरोस् ५ नम्बरका नागरिकलाई यो संशोधन प्रस्ताव कत्ति पनि स्वीकार्य हुनै सक्दैन । यो प्रस्ताव संसदमा दर्ता गर्नु भनेको बली राखेको आगोमा हाम फाल्नु बराबर हो भन्ने कुराको ज्ञान तपाईसँग नहुँदा आज जनता पीडामा छन् ।
हाम्रो संविधान हामी नेपालीको हो वा छिमेकी देशको ? हामीलाई जवाफ चाहियो यो कसको हो ? एसियामै बुद्धिमानी नेताको रुपमा पहिचान बनाउनु भएको तपाईंजस्तो नेतालाई राजदूतले प्रभावमा पारेको हल्ला छ नि त्यो चाहिँ के हो ? यदि त्यसै हो भने अब हामीले तपाईलाई कसरी बुद्धिमानी नेता भन्ने ?
हामी चाहान्थ्यौ लगभग ४० प्रतिशत नेपाली बसोवास गर्ने भारतमा नेपाली भाषा पनि बोल्न सक्ने व्यवस्था होस् । नेपाली पैसा भारतमा पनि चल्ने व्यवस्था होस् । तर, यसको पहल किन कसैले गर्न सक्दैन ? यो आम नेपालीको प्रश्न हो ।
प्रधानमन्त्रीज्यू संघीयतालाई आफैले राम्रोसँग अध्ययन नगरी स्थानीय तहसम्म देश चिरा पार्दा के हुन्छ भन्ने कुरा किन अझै बुझ्न सक्नुहुन्न ? जनताको भावना भन्दा विपरित विदेशी शक्तिको सुझाव बोकेर केन्द्रका राजनितिज्ञ चल्नु पर्ने किन ?
तपाईंले गैरजिम्मेवार ढंगले गरेका निर्णयले आज जनताको रगत तातेको छ । जनता जनतामा फाटो आएको छ । तपाईंलाई थाहै छ पूर्व समानुपातिक सांसद् तथा तपाईंकी छोरी रेणु दाहालको जिल्ला आन्दोलित छ । यदि जिम्मेवार बाबु बन्नुहुन्छ भने छोरीलाई जिल्ला पठाउनुहोस् ।
आज तपाईं ‘हिमाल, पहाड, तराई कोही छैन पराई’ भन्ने भावमा दृढ जनतालाई पहाडे र मधेसीको रुपमा विभाजन किन गर्नुहुन्छ ? दश दश बर्षसम्म स्थानीय निकायको चुनाव नगरी प्रतिनिधि बिहिन गाउँ बन्दा समेत जनता शान्त थिए । तर, आज तपाईंको सानो निर्णयले जनता आन्दोलित भए । प्रधानमन्त्रीको कुर्सीमा बसेपछि जनता बिर्सनु भयो ठिकै छ तर एक पटक आम नागरिक भएर सोच्नुहोस् र प्रदेश नम्बर ५ का जनताको पीडा र भावलाई बुझ्नुहोस् । जनताको भावना बुझ्नुभयो भने हामी फेरि यो टुक्राटुक्रा शरीरको उपचार गरेर प्रधानमन्त्री प्रचण्ड जिन्दावाद भन्दै सडकमा खुशीयाली मनाउने छौँ । यो आम नेपाली जनताको चाहना तपाईंलाई यो पत्रमार्फत् पठाएकी छु । गल्ती भए माफ गरिदिनुहोला । यो तपाईंको जन्मदिनले प्रदेश नम्बर ५ का जनतालाई न्याय गरोस् ।
उही गंगा खड्का
प्रदेश नम्बर ५ गुल्मी
प्रतिक्रिया दिनुहोस !
