संशोधन प्रस्ताव फिर्ता लिएर निर्वाचनतर्फ केन्द्रित हुनुपर्छः बिजुक्छे

भक्तपुरः नेपाल मजदुर किसान पार्टीका अध्यक्ष नारायणमान बिजुक्छेले संविधान संशोधन प्रस्तावले निर्वाचनको वातावरण बिथोलिएको बताएका छन् ।

वासु माविको ५४औँ तथा वासु कलेजको आठौँ वार्षिकोत्सव समारोहलाई सम्बोधन गर्दै उनले रकारले तत्काल स्थानीय निर्वाचनको मिति घोषणा गरेर कार्यक्रम अगाडि बढ्नुपर्ने बताए ।

‘देशभर एकै पटक निर्वाचन गर्न नसके चरणबद्घ रुपमा निर्वाचन गर्न सकिन्छ, सरकारले चाहे निर्वाचन सम्भव छ’ उनले भने ।

कार्यक्रममा विद्यालय व्यवस्थापन समितिका अध्यक्ष सरोजराज गोसाईं, जिशिअ अर्जुनकुमार रायमाझी, वागीश्वरी माविका प्राचार्य कृष्णप्रसाद धन्छालगायतले सामुदायिक विद्यालयको शिक्षाको गुणस्तरलाई उच्च बनाउन सबै लाग्नुपर्नेमा जोड दिए ।

सो अवसरमा कक्षा १ देखि १२ सम्म उत्कृष्ट हुने विद्यार्थी, माविबाट प्रवेशिका उत्तीर्ण विद्यार्थी, विद्यावारिधि र एमफिल गरेका विद्यार्थीलाई पुरस्कार प्रदान एवं २५ वर्ष सेवा गर्ने शिक्षिका हरिमाया कायस्थ र शिक्षक लक्ष्मीहरि ताम्राकारलाई सम्मान गरिएको प्राचार्य अम्बिका न्याइच्याईँले जानकारी दिए । रासस