सामाखुसी र ढुकु विजयी (भिडियाेसहित)
काठमाडौंः रेडबुल फुटसल लिगअन्तर्गत सोमबार भएको खेलमा सामाखुसी फुटसल र ढुकु फुटसलले जित हात पारेका छन् । हरिसिद्धि फुटसल र कुमारी फुटसलबीच ३-३ गोलको बराबरी भयो ।
समूह ‘बी'अन्तर्गत भएको खेलमा सामाखुसीले बीजी ब्रदर्स फुटसललाई ७-५ गोलले हरायो । पहिलो हाफ २-२ गोलको बराबरीमा सकिएको उक्त खेलको दोस्रो हाफमा सामाखुसीले पाँच गोल गरेको थियो ।
दोस्रो हाफमा घरेलु टोली बीजी ब्रदर्सले भने तीन गोलमात्र गर्न सक्यो । सामाखुसीका नवीन लामा र श्याम नेपालीले तीनतीन गोल गरे । सन्तोष तामाङले एक गोल गरे । बीजी ब्रदर्सका प्रकाश थापाले तीन र उमेश खड्काले दुई गोल गरे । सामाखुसीका नवीन प्लेयर अफ दी म्याच घोषित भए ।
हालसम्म १४ खेलबाट २८ अंक जोडेको सामाखुसी समूह ‘बी'को दोस्रो स्थानमा छ । शीर्ष स्थानमा आसीन शंखमूल फुटसलको १३ खेलबाट ३१ अंक छ । उक्त समूहमा १४ खेलबाट २७ अंक बटुलेको कुमारी फुटसल तेस्रो स्थानमा छ । १३ खेलबाट सामाखुसी फुटसल र ताहाचल फुटसलले २५/२५ अंक जोडेका छन् । १४ खेलपछि हरिसिद्धि फुटसलको २४ अंक छ ।
हरिसिद्धिको मैदानमा भएको खेलमा पहिलो हाफ २-२ गोलको बराबरीमा सकिएको थियो । दोस्रो हाफमा दुवै टोलीले एकएक गोल गरे । हरिसिद्धिका रइफी महर्जनले दुई र रिपु भुलानले एक तथा कुमारीका रूपेश क्षेत्रीले दुई र कमल श्रेष्ठले एक गोल गरे ।
हरिसिद्धिका मनोज तामाङ प्लेयर अफ दी म्याच घोषित भए । समूह ‘ए'अन्तर्गत भएको खेलमा ढुकु फुटसलले इम्पेरियल रुल्ज फुटसललाई १०-७ गोलले हरायो । पहिलो हाफमा ७-१ गोलको अग्रता लिँदै ढुकुले जितको सम्भावना बलियो बनाएको थियो ।
दोस्रो हाफमा इम्पेरियल रुल्जले ६ र ढुकुले तीन गोल थपेको थियो । ढुकुका सुरज राउतले चार, अंशु कार्कीले तीन, प्रजेश अधिकारीले दुई र छवि रोक्काले एक गोल गरे । इम्पेरियलका सन्देश सिलवाल, किसन अधिकारी र नीराजन गैरेले दुई दुई तथा दीपक घिसिङले एक गोल गरे । सुरज राउत प्लेयर अफ दी म्याच घोषित भए ।
समूहमा १४ खेलबाट २७ अंक भएको ढुकु तेस्रो स्थानमा छ । समूहमा १३ खेलबाट ३१ अंक जोडेको किक अफ तालिकाको शीर्ष स्थानमा छ ।
१३ खेलबाट २९ अंक भएको बानेश्वर रिक्रिएसनल सेन्टर दोस्रो स्थानमा छ । चौथो स्थानमा रहेको ह्वाइट हर्सको १३ खेलबाट २३ अंक छ । हरेक समूहमा आठआठ टोली सहभागी छन् । प्रतियोगिता एएमए इभेन्ट्सले आयोजना गरेको हो ।
भिडियाे हेर्नुहाेस्
प्रतिक्रिया दिनुहोस !
