काठमाडौं: एमालेसहितका प्रतिपक्षी दलले व्यवस्थापिका संसदमा सरकारले दर्ता गरेको संविधान संशोधन प्रस्ताव सम्बन्धी विधेयक फिर्ता नभएसम्म संसद्को अवरोध कायम राख्ने निर्णय गरेका छन् ।
प्रमुख प्रतिपक्षी दल एमालेको संसदीय दलको कार्यालय सिंहदरबारमा मंगलबार बसेको प्रतिपक्षी दलका सांसदको बैठकले संशोधन प्रस्ताव फिर्ता नभएसम्म अवरोधलाई निरन्तरता दिने निर्णय गरेको हो ।
बैठकपछि अन्नपूर्णसँग कुरा गर्दै राष्ट्रिय जनमोर्चाका अध्यक्ष चित्रबहादुर केसीले भने, ‘संसद्मा दर्ता भएको संविधान संशोधन फिर्ता नभएसम्म संसद्मा हाम्रो अवरोध निरन्तर रहने निर्णय भएको छ ।’
बैठकमा एमाले, नेकपा माले, नेपाल मजदुर किसान पार्टी, राष्ट्रिय जनमोर्चा, नेपाल परिवार दल, मधेशी समाता पार्टीलगायत आठ दल सहभागी थिए । बैठकले सरकारले संविधान संशोधन विधेयक फिर्ता गरेर स्थानीय निर्वाचनसँग सम्बन्धी विधेयक संसदमा दर्ता गरे संसद् चल्न दिने निर्णय समेत गरेको केसीले जानकारी दिए ।
माओवादी केन्द्रका अध्यक्ष पुष्पकमल दाहाल ‘प्रचण्ड’ नेतृत्वको सरकारले व्यस्थापिका संसदमा दर्ता गरेको संविधान संशोधन विधेयक राष्ट्रघाती भएको भन्दै निरन्तर संसद् अवरोध गर्दै आएको छ ।
प्रतिक्रिया दिनुहोस !
