विराटनगर: नेपाल अटोमोबाइल एसोसिएसनले फागुन १४ गतेबाट पाँच दिनसम्म नेपाल, भारत र भुटानलाई समेटेर हिमालयन ड्राइभ पाँचौ अन्तराष्ट्रिय कार र्याली आयोजना गर्ने भएको छ । भारतबाट सुरु हुने र्याली चैत १९ गते सकिने छ ।
आयोजकले मंगलबार विराटनगरमा पत्रकार सम्मेलनको आयोजना गरेर अन्तराष्ट्रिय कार र्यालीका बारेमा जानकारी दियो र्यालीमा ६० वटा कारमा दुई सय ५० जनाले सहभागिता जनाउने छन् । जसमा पाँचवटा नेपालका, २० वटा आयोजकका र अन्य भारत तथा भुटानका कार हुनेछन् ।
एसोसिएसनका पूर्वाञ्चल अध्यक्ष कविन श्रेष्ठले भारतबाट सुरु हुने र्याली भुटान हुँदै नेपालमा इलामको पशुपतिनगरबाट प्रवेश गरेर विर्तामोड, इटहरी, भेडेटार, हिले भएर विराटनगरको महेन्द्रचौकबाट भारतको सिलिगुडीमा पुगेर समापन गरिने जानकारी दिए । पूर्वाञ्चल क्षेत्रीय खेलकुद विकास समितिको सहयोग रहने र्याली सिलिगुडीमा पुगेर विजेतालाई पुरस्कार वितरण गरिएपछि समापनको घोषणा गरिने उनले बताए ।
एसोसिएसनका केन्द्रीय सदस्य सुवाष आचार्यका अनुसार नेपाल, भारत र भुटानको संस्कृतिक, पर्यटन तथा व्यवसायिक विकास तथा समन्वयका लागि र्यालीले महत्वपूर्ण भूमिका निर्वाह गर्ने जनाए । उनका अनुसार समय, गति र दुरीलाई ख्याल राखेर ट्राफिक नियमको पालना गर्दै र्यालीको आयोजना गरिने छ । आचार्यले अनुशासनको पालना र आयोजकले बनाएको नियमलाई ख्याल गरेर विजेता घोषित गरिने छ ।
‘आयोजकले एउटा नियम बनाएको हुन्छ,’ उनले भने, ‘त्यही नियमलाई पछ्याउँदै विजय हाँसिल गर्न सक्नुपर्छ ।’ आचार्यले छिटो दगुर्ने र नियमको पालना नगर्नेले विजेता बन्न नसक्ने जानकारी पनि दिए । उनले कुनै पनि देशमा ट्राफिक व्यवस्थापनमा बाधा नपुर्याउने गरी र्यालीको आयोजना गरिने बताए । आयोजकले र्यालीमा प्रथम हुनेलाई भारतीय एक लाख रुपैयाँ, द्धितियलाई ५० हजार र तृतियलाई २५ हजार रुपैयाँ नगद र ट्रफी प्रदान गरिने जनाएको छ ।
प्रतिक्रिया दिनुहोस !
