संशोधन स्थगन गरेर चुनावमा जाऊः भुसाल

बुटवलः नेकपा एमालेका उपमहासचिव घनश्याम भुसालले संसदमा दर्ता गरिएको संसोधन प्रस्तावलाई स्थगन गरेर चुनावमा जानु अहिलेको निकास भएको बताएका छन् । सरकारलाई प्रस्ताव फिर्ता लिन अफ्ठ्यारो हुनु स्वभाविक भएको भन्दै उनले स्थगन गरेर अघि बढ्नु राम्रो विकल्प हुने बताए ।

‘एमालेले फिर्ता भनेको छ, सरकारलाई फिर्ता नै गर्न नैतिकताले नदिन सक्छ, त्यसैले स्थगन गरेर चुनावमा लाग्नु नै उत्तम विकल्प हो, उनले भने । प्रेस चौतारी रुपन्देहीले बुधबार बुटवलमा गरेको पत्रकार भेटघाटमा नेता भुसालले स्थगनको गर्न सरकार तत्पर भए एमाले चुनावको विषयमा सहमत हुन सक्ने बताए ।

संसदमा पेश गरे पनि प्रस्ताव फेल हुने जिकिर गर्दे उनले संविधानको विरुद्धमा गलत नजिर बस्ने भएकाले एमालेले टेवल नै गर्न नदिने अडान लिएको स्पष्ट पारे । यो विकल्पबाट अघि बढ्दा गतिरोध अन्त्यसंगै संविधान कार्यान्वयनमा जाने उनले बताए ।

उनले कांग्रेस सभापति देउवाले भने जस्तो संसदमा नै प्रस्ताव पेश गर्न एमाले तयार नभएको बताए । ‘देउवाजीको संसद खुलाउने ट्याक्टिकल कुरा हो, यसमा हाम्रो सहमति छैन्, उनले भने ।

निर्वाचन गर्दा अहिलेकै संरचनामा गर्न सकिने भन्दै उनले त्यसलाई संविधानबाट नबाझिने गरी व्याख्या गर्नुपर्ने बताए । अहिलेका स्थानीय निकायलाई तहको परिभाषा दिएर संविधान कार्यान्वयनमा लाग्न एमालेले छलफल चलाउन सक्ने उनले बताए ।

‘संविधानले नै नचिन्ने चुनाव गर्नु हुँदैन, उनले भने–‘त्यसैले अहिलेको स्थानीय निकायलाई तह भनेर परिभाषित गर्न सकिन्छ ।' एमालेले संसोधन फिर्ता या स्थगन नहुँदासम्म संसद र सडक आन्दोलन जारी राख्ने उनले स्पष्ट पारे । पुस तीन गतेसम्मको आमहड्ताल जारी हुदाँसम्म राजनीतिक निकास निस्किने उनले विश्वास गरे । आफूहरुको माग सरकारसंग भएकाले अन्य दलहरुसंग अहिलेको एजेण्डामा छलफल पनि नुहने र सम्बन्धित पनि नमान्ने उनले बताए ।

फरक प्रसंगमा उनले संघीयतालाई धमिलो पानीमा माछा मार्ने मध्यम बनाउन नहुने बताए । संसारका कुनै पनि देश नयाँ संरचनामा जादा जटिलता महसुस गरेको दृष्टान्त दिदै उनले नेपालमा पनि अहिले त्यही भइरहेको बताए । ‘नयाँ संरचनामा जादा जटिलता हुनु स्वभाविक हो, यसलाई हाउगुजी सम्झिनु हुदैन, उनले भने ।