धादिङः कक्षा १२ मा अध्ययनरत विद्यार्थीको एक समूहले धादिङ गोगनपानी–७ पैरेस्थित हिमालचुली प्राथमिक विद्यालयका चेपाङ तथा तामाङ समुदायका बालबालिकालाई स्वास्थ्य जाँच, शैक्षिक सामग्री र १५ दिनका लागि बिहानी खाना उपलब्ध गराएको छ । युवा स्वयंसेवीहरूको संस्था ‘वी फर एस’ ले मंगलबार बालबालिकाका लागि उक्त सहयोग प्रदान गरेको हो ।
धादिङ महादेवबेसीबाट करिब ४५ मिनेटको पैदल यात्रापछि पुगिने यो गाउँमा चेपाङ तथा तामाङ समुदायको बाहुल्य छ । मुख्य राजमार्गबाट नजिकै भए पनि बिजुलीबाहेक खानेपानी, स्वास्थ्य, शिक्षालगायत सुविधा उपलब्ध छैन । करिब ५० जना स्वयंसेवक र कान्ति अस्पतालका बालरोग विशेषज्ञ डा. सिजन थापासहितको टोलीले कक्षा १ देखि ३ सम्मका ५५ जना विद्यार्थीको स्वास्थ्य जाँच गरेको थियो ।
उक्त विद्यालयमा विद्यार्थीको संख्या धेरै भए पनि कक्षाकोठा दुईवटा मात्र छन् । विद्यार्थीका बाबुआमाको आर्थिक स्थिति नाजुक भएको र बिहानबेलुका खान पनि नपुग्ने भएकाले विद्यार्थीलाई भोकै पठाउने गरेको प्राचार्य इन्दिरा अधिकारी रुपाखेती बताउँछिन् । धनी परिवारका बालबच्चा सहरमा गएर पढ्ने र दिनरात ज्यालामजदुरी गरेर जीविकोपार्जन गर्नेका बालबालिका मात्र यो विद्यालयमा पढ्न आउने उनी बताउँछिन् । उनी भन्छिन्, ‘जिल्ला शिक्षा कार्यालयबाट बर्सेनि विद्यालय निरीक्षक आउँछन् तर अरू विद्यालयसरहको सेवासुविधाबाट हामी वञ्चित छौं ।’ तीनजना मात्र शिक्षक रहेको यो विद्यालयमा दुईजना शिक्षकको तलब मात्र जिशिकाले दिने गरेको छ ।
विद्यार्थीको स्वास्थ्य जाँचपश्चात् डा. थापाले भने, ‘बालबच्चामा कुपोषणको समस्या नरहे पनि सरसफाइको कमीका कारण घाउखटिरा, रुघाखोकी र छाती दुख्ने समस्या धेरै पाएँ ।’ उनका अनुसार अभिभावकले सरसफाइमा हेलचेक्र्याइँ गरेकाले यस्ता समस्या देखा परेका हुन् । फोहोरमैलाका कारण विद्यार्थीमा पेट फुल्ने र कान पाक्नेलगायत स्वासप्रस्वास प्रणालीसम्बन्धी रोग धेरै मात्रामा लागेको उनले बताए । स्वास्थ्य सुधारका निम्ति प्रत्येक महिना स्वास्थ्य जाँच गर्नुपर्ने र सरसफाइमा विशेष ध्यान दिनुपर्ने उनले बताए ।
स्वास्थ्य जाँचमा कक्षा ३ मा अध्ययनरत छात्र एम्बिसन लामाको अवस्था गम्भीर पाइएको थियो । १० वर्ष उमेरका उनमा सरसफाइको कमीका कारण रगतको समस्या देखिएको छ । बुबाआमा गरिब र दिनरात काममा गएर जीविकोपार्जन गर्ने गरेकाले उनी हजुरबुबा हजुरआमासँग बस्दै आएका छन् ।
स्वयंसेवक विद्यार्थीमध्ये अधिकांश सैनिक आवासीय महाविद्यालयमा विज्ञान संकायमा कक्षा १२ मा अध्ययनरत छन् । उनीहरूले एक हजार दुई सयवटा कापी सहयोग गरेका थिए । ‘वी फर एस’ का संस्थापकद्वय मनिता खड्का र प्रशान्तराज गिरीको नेतृत्वमा स्यवंसेवकको टोली पैरे पुगेको थियो।
प्रतिक्रिया दिनुहोस !
