चुनावमा सहभागी नहुने गोपाल किरातीको चेतावनी
विराटनगरः पुरानै संरचनामा स्थानीय निकाय निर्वाचन हुन लागेको भन्दै माओवादी केन्द्र प्रदेश नम्बर १ का इन्चार्ज एवम् पूर्वमन्त्री गोपाल किरातीले आक्रोश व्यक्त गरेका छन् ।
विराटनगरमा बिहीबार पत्रकार सम्मेलनम राजतन्त्रकालीन संरचनामै स्थानीय निकायको निर्वाचन गराउन राजनीतिक दलहरुबीच सहमति हुन लागेका उनले विरोध गरेका हुन् । नेपाल सरकारले गठन गरेको आयोगले सात सय ४४ को संख्यामा स्थानीय तह पुनःसंरचनाको प्रतिवेदन बुझाउनै लागे पनि दलहरु पुरानै संरचनाको पक्षमा रहेको उनको आरोप छ ।
कांग्रेस, एमाले, राप्रपा र मधेशसी दल पहिचानको नारा लगाउँदै राजतन्त्रकालीन पुरानै संरचनामा निर्वाचन गराउन उद्यत रहेको आरोप किरातीको छ ।
‘पुरानै संरचनामा स्थानीय निकाय निर्वाचन गराउनु भनेको जनताले रगत, आँसु र पसिनाको धारा बगाएर ल्याएको गणतन्त्र खोस्ने षड्यन्त्र हो,’ उनले भने, ‘गणतन्त्र नेपालको सरकार र प्रधानमन्त्री पुष्पकमल दाहाल ‘प्रचण्ड’ यस्तो षड्यन्त्रको बाहक बन्नु हुँदैन ।’
किरातीले पुरानै संरचनामा निर्वाचन भए त्यसलाई माओवादीले वहिष्कार गर्ने दाबी गरे । ‘राजतन्त्रकालिन पुरानै संरचनामा गरिने प्रतिगामी निर्वाचनमा नेकपा (माओवादी केन्द्र) को १ नम्बर प्रदेश सहभागी हुँदैन,’ किरातीले भने ।
किरातीले गणतन्त्र ल्याउने क्रान्तिकारी सबैको चिहान खन्ने योजना अनुरुप पुरानै संरचनामा निर्वाचन गराउन खोजिएको आरोप लगाए । नयाँ संरचनामा निर्वाचन नगरिए जनताले परिवर्तनको आभाष पनि गर्न नपाउन किरातीको भनाइ छ ।
प्रतिक्रिया दिनुहोस !
