समुद्री किनारमा हेरिटेज सुन्दरी

समुद्री तटीय क्षेत्र त्यसै पनि रमणीय लाग्छ । आँखाले भ्याएसम्म पानी र त्यसमाथि आउने छालको दृश्यले मनमस्तिष्कलाई प्रफुल्लित बनाउँछ । त्यसमाथि बान्की परेका सुन्दरी र उनीहरूको आत्मविश्वासले भरिपूर्ण हाउभाउले वातावरणलाई रोमाञ्चक बनाउनु स्वाभाविक हो । प्रसंग हो, हालै श्रीलंकामा सम्पन्न अन्तर्राष्ट्रिय सौन्दर्य प्रतियोगिता 'हेरिटेज प्याजेन्ट २०१६' र सो प्रतिस्पर्धाका सहभागी सुन्दरीको बिकिनी फोटोसुटको ।

यस प्रतियोगितामा कोरियोग्राफरको अभिभारा लिएर म श्रीलंका पुगेको थिएँ । फोटोग्राफर थिए भारतका चेतन शर्मा । प्रतियोगितामा विभिन्न मुलुकका २१ सुन्दरी सहभागी थिए । हामीसँग आयोजक ई प्लानेट प्रालिका प्रमुखद्वय नेपालका सन्तोष सापकोटा र जिम्बाब्वेका कुल्भिन माभुंगा पनि थिए । दिउँसो करिब साढे ३ बजे हामी बिकिनी फोटोसुटका लागि समुद्री किनारतर्फ लाग्यौं । गन्तव्य थियो, श्रीलंकाको बेरुवालास्थित लाइट हाउस द्वीप ।

हामी बसेको होटल सेक्कु भिल्लाबाट लाइट हाउस भिल्लासम्मको यात्रा तय भएपछि लाइट हाउस द्वीपसम्म पुग्न हिन्द महासागरको एउटा पाटो तरेर जानु थियो । हाम्रो लागि उपलब्ध थियो सानो मोटर बोट जसमा एक पटकमा आठजनासम्म सवार गर्न सकिन्थ्यो ।

फोटोग्राफर शर्मा, म र केही सहभागी अगाडि लाग्यौं । सूर्यास्तअगाडि अर्थात् तीन घन्टाको अवधिमा सबै फोटो सुट सकाउनु थियो । ट्रिनिडाड एन्ड टोब्यागो, तान्जानिया, म्यानमार, जिम्बाब्वेका सहभागी हामीसँगै लागे । हिन्द महासागरको पानी र समुद्री छालसित मोटरबोटमा लगभग १० मिनेटको यात्रा थोरै डर र धेरै रोमाञ्चकता थियो । गन्तव्यमा पुगेपछि लोकेसन चयनमा केही समय खर्च भयो । लाइट हाउस द्वीपको ठीक पछाडि हिन्द महासागरलाई ब्याक ड्रप बनाएर फोटो सुट सुरु भयो ।

सुरुमा अफ्रिकी सुन्दरी ट्रिनिडाड एन्ड टोबागोका प्रतिस्पर्धी क्यामराअगाडि उभिए । पालैपालो ट्रिनिडाडकी टिन सुन्दरीले आफ्नो ग्ल्यामरस छविलाई आत्मविश्वासका साथ प्रदर्शन गरिन् । फोटोग्राफर चेतन ती सुन्दरीको पोजलाई उत्कृष्ट फ्रेममा कैद गर्न थाले । म उनीहरूलाई पोजहरू सिकाउन थालेँ । भिडियो क्यामेरामा फोटोसुटका दृश्य कैद गर्ने जिम्मेवारी पनि मेरै काँधमा थियो । ट्रिनिडाड र जिम्बाब्वेकी टिन सुन्दरीले बिकिनी अवतारमा विभिन्न पोज दिइनसक्दै अन्य सहभागी पनि आइपुगे ।

फोटोसुट टिन र मिस समूहमा सहभागी म्यानमारका सुन्दरी बढी प्रभावकारी देखिए । मिलेको जीउडाल, सही पोज दिनसक्ने खुबीका कारण उनीहरूको प्रस्तुति निकै आकर्षक र उत्कृष्ट रह्यो । त्यसो त रसिया, जिम्बाब्वे, ट्रिनिडाड एन्ड टोबागोका सुन्दरीहरू पनि कम थिएनन् । मिस र टिन समूहका लागि बिकिनी फोटोसुट बेस्ट बडी अवार्डका लागि महत्त्वपूर्ण थियो । यद्यपि मिसेस समूहका सहभागीले पनि बिकिनी फोटोसुटमा उत्साहपूर्वक सहभागिता जनाए । यस विधामा म्यानमार, भारत र ट्रिनिडाड एन्ड टोबागोका सहभागीको प्रस्तुति सराहनीय रह्यो । बिकिनी अवतारमा फोटोसुट गर्ने क्रममा सहभागीहरू पनि घरि सेल्फी त घरि विफीमा बेफुर्सद देखिन्थे ।

समुद्री छालले जिस्क्याइरहन्थ्यो, हावाको गति आनन्ददायी थियो । सुन्दरी, समुद्र र ग्ल्यामरको अभूतपूर्व दृश्य कैद गर्दागर्दै सूर्यास्त हुन लागेको पत्तै भएन । हामी सामूहिक तस्बिरका लागि हतारियौं । तर, सिंगापुर र ट्रिनिडाडकी मिस सहभागीको फोटोसुट अझै बाँकी थियो । कालो वर्णकी ट्रिनिडाडकी सहभागीपछि अन्तमा सिंगापुरकी सुन्दरीले बिकिनी अवतारमा आफ्नो फोटोसुट गराइन् । अन्त्यमा त्यो रमणीय वातावरणलाई सम्झनामा कैद गर्न केही पोज दिन म पनि अग्रसर भएँ । केही पोज कुल्भिनले दिए ।

उज्यालोले विस्तारै बिदा माग्न थालेपछि हामी फोटोसुट सम्पन्न गरेर अगाडि बढ्ने तयारीमा जुट्यौं । यात्रा मोटरबोटबाटै थियो । तर त्योभन्दा अगाडि स्थानीय मित्रहरूले हाम्रा लागि व्यवस्था गरेको नरिवल पानी, फिस र आलुको बार्बिक्युको स्वाद चाख्ने अवसर मिल्यो । धेरै उत्साह र रोमाञ्चकतासँगै थोरै भोक पनि थियो । हाम्रो यात्रा मोटरबोटको सहारामा अघि बढ्यो । लाइट हाउसको उज्यालो, विशाल समुद्रको पानीमा आएको छालको बहावसँगै हामी एउटा सन्तुष्टि, खुसी र मीठो सम्झना बोकेर हुइँकियौं ।