काठमाडौंः राष्ट्रिय जनमोर्चाका अध्यक्ष चित्रबहादुर केसीले व्यवस्थापिका संसदमा दर्ता भएको संविधान संशोधन विधेयकले नेपाललाई भारतसँग मिसाउने छोटो हतियार भएको टिप्पणी गरेका छन् ।
अखिल नेपाल बुद्धिजीवी संघले शनिबार ‘संविधान संशोधनको प्रस्ताव र राष्ट्रियताको प्रश्न’ विषयक विचार गोष्ठीलाई सम्बोधन गर्दै पूर्व उपप्रधानमन्त्री समेत रहेका केसीले भने, ‘विधेयक कालान्तरमा नेपाललाई भारतमा मिसाउने छोटो हतियारको स्वरुपमा आएको हो ।’
नेता केसीले पहाड र तराई कुनै हालतमा अलग गर्न नहुने भन्दै मधेसवादी दलले दिल्लीको कुरा गरिरहेको आरोप लगाए ।
कार्यक्रममा नेकपा (मसाल) का महामन्त्री मोहनविक्रम सिंहले कार्यपत्र प्रस्तुत गर्दै संशोधन प्रस्तावले नेपालको राष्ट्रियतामाथि गम्भीर, जटिल र विकराल प्रश्न उठाएको उल्लेख गरे ।
नेता सिंहले प्रस्ताव तराईलाई नेपालबाट स्वतन्त्र गराई भारतमा गाभ्न र नेपाललाई दोस्रो सिक्किम बनाउन ल्याइएको दाबी गरे ।
कार्यक्रममा प्रा डा सुरेन्द्र केसी, संविधानविद् विश्वकान्त मैनाली, नेकपा (क्रान्तिकारी माओवादी)का सचिवालय सदस्य इन्द्रमोहन श्रेष्ठलगायतले विधेयकले राष्ट्रिय एकतालाई कमजोर पार्ने धारणा व्यक्त गरे । रासस
प्रतिक्रिया दिनुहोस !
