एजेन्सीः क्लब विश्व कप फुटबलको उपाधि रियल म्याड्रिडले जितेको छ । आइतबार भएको खेलमा रियल म्याड्रिडले जापानिज क्लब कासिमा एन्टलर्सलाई ४–२ गोलले हराउँदै च्याम्पियन बनेको हो ।
रियलले अतिरिक्त समयमा कासिमालाई स्तब्ध बनाएको थियो । रियलको जितमा क्रिस्टियानो रोनाल्डोले ह्याट्रिक गरे । खेलमा सुरुआती अग्रता रियलका करिम बेन्जेमाले नवौं मिनेटमा गरेको गोलले रियलले लिएको थियो ।
कासिमाका गाकु सिवासाकीले लगातार दुई गोल गरेपछि रियल केहीबेर अत्तालियो । तर, रोनाल्डोले पेनाल्टीमार्फत गोल गर्दै रियललाई २–२ गोलको बराबरीमा पुर्याए ।
६० औं मिनेटमा पहिलो गोल गरेका रोनाल्डोले अतिरिक्त समयमा दुई गोल थप्दै ह्याट्रिक पूरा गरे र रियललाई दोस्रोपटक क्लब विश्वकपको उपाधि दिलाए ।
रियल यसअघि २०१४ मा च्याम्पियन बनेको थियो । रियलले यस सिजनमा आफ्नो अपराजित यात्रालाई ३७ औं खेल बनाएको छ । यसैगरी तेस्रो स्थानको लागि भएको अर्को खेलमा कोलम्बियाको एट्लेटिको नेसनलले टाईब्रेकरमा मेक्सिकोको क्लब अमेरिकालाई ४–३ गोलले हरायो ।
निर्धारित सकयमा दुवै टोली २–२ गोलको बराबरीका रोकिएका थिए ।
प्रतिक्रिया दिनुहोस !
