नेपाल एक विकेटले विजयी( भिडियोसहित)
काठमाडौः नेपालले श्रीलंकामा जारी एसीसी यू-१९ एसिया कप क्रिकेटमा सान्त्वना जित हात पारेको छ । समूहगत चरणको आफ्नो तेस्रो तथा अन्तिम खेलमा मलेसियालाई एक विकेटले हराएर नेपालले सान्त्वना जित हात पारेको हो ।
अघिल्ला दुवै खेलमा पराजित भएपछि नेपाली टोली मलेसियासँग भिड्नुअघि नै पहिलो चरणबाट बाहिरिने निश्चित भएको थियो । पहिलो खेलमा श्रीलंकासँग एक रनले पराजित भएको नेपाल दोस्रो खेलमा भारतसँग ६ विकेटले पराजित भएको थियो । टस जितेको नेपालले मलेसियालाई ब्याटिङ गर्न बोलाएको थियो ।
मलेसियाले ४४.४ ओभरमा सबै विकेट गुमाएर एक सय ५४ रन जोड्यो । मलेसियालाई सस्तोमा समेट्न अदिल खानले तीन तथा सन्दीप लामिछाने र दीपेन्द्रसिंह ऐरीले दुईदुई विकेट लिए । रोहित पौडेल, शुभांकर उरावले एक एक विकेट हात पारे ।
मलेसियाका कप्तान वीरनदीप सिंहले सर्वाधिक ७५ रन जोडे । मुहम्मद हासिफले २१ र सैफउल्लाह मलिकले ११ रन बनाए । अन्य मलेसियन ब्याट्सम्यानले दोहोरो अंकमा रन जोड्न सकेनन् । नेपालले ४४.४ ओभरमा नौ विकेट गुमाएर लक्ष्य पूरा गर्यो । नेपालको जितमा मध्यक्रमका अनिल साह र पछिल्लो क्रमका पवन सरार्फले महत्वपूर्ण भूमिका खेले ।
भिडियाे हेर्नुहाेस्
अनिलले ३२ र पवनले अविजित २९ रन जोडे । यी दुईबीच नवौं विकेटका लागि ३८ रनको साझेदारी भएको थियो । नेपालले १० औं विकेटका लागि नौ रनको साझेदारी गर्यो । कप्तान सन्दीप लामिछाने तीन रनमा अविजित रहे । नेपालको पालीमा अविनास कर्णले पनि २९ रन जोडे । दीपेन्द्र ऐरीले २२ र रोहित पौडेलले १२ रन बनाए ।
आसिफ शेख एक र रवीन्द्र शाही पाँच रन जोडेर आउट भए भने अदिल खान र प्रकाश केसीले खाता खोल्न सकेनन् । अनिलले ६६ बलमा एक छक्का र दुई चौका हिर्काए । पवनले ६७ बलमा एक छक्का र दुई चौका प्रहार गरे ।
अविनासले ४५ बलमा चार चौका हिर्काए । २५ बल खेलेको दीपेन्द्रले चार चौका प्रहार गरे । मलेसियाका वीरनदीप सिंहले तीन तथा सेद अजिज, मुहम्मद हाफिज र मुहम्मद आमिरले दुई दुई विकेट लिए । समूह एमा नेपाल तीन खेलबाट दुई अंक जोडेर तेस्रो भयो । समूहमा तीनवटै खेल जितेर भारत विजेता र दुईवटा खेल जितेको श्रीलंका उपविजेता हुँदै सेमिफाइनल पुगे ।
प्रतिक्रिया दिनुहोस !
