निम्बसका दुई खानेतेल सार्वजनिक

काठमाडौंः कृषि क्षेत्रको अग्रणी निजी संस्था निम्बस होल्डिङअन्तर्गतको प्रोवायोटिक इन्डस्ट्रिजले ब्यन्जन ब्रान्डमा दुई खानेतेल सार्वजनिक गरेको छ । निम्बसले ब्यन्जन ब्रान्डअन्तर्गत सूर्यमुखि र तोरीको खानेतेल सार्वजनिक गरेको हो ।

निम्बसले आइतबार पत्रकार सम्मेलनको आयोजना गरी दुई उत्पादनको आधिकारिक रूपमा सार्वजनिक गरेको हो । निम्बसका प्रबन्ध निर्देशक आनन्द बगरीया, प्रोबायोटेकका कार्यकारी निर्देशक डा. दिनेश गौतम, निम्बस कर्पोरेट अफेयरका वरिष्ठ म्यानेजर डा. शितलकाजी श्रेष्ठले उक्त ब्रान्डको तेल सार्वजनिक गरेका थिए । बगरीयाले सार्वजनिक गरेका दुवै थरीका तेल उच्च गुणस्तरीय र स्वच्छ भएको दाबी गरे ।

‘नेपालमा उत्पादन भइरहेका खानेतेल गुणस्तरमा सम्झौता गरी बजारमा ल्याइएका छन्,’ प्रबन्ध निर्देशक बगरीयाले भने, ‘तर हामीले गुणस्तर र तेलको मौलिक गुणसँग कुनै सम्झौता गरेका छैनौं । विकसित मुलुकमा प्रयोग हुने प्रविधि र कच्चा पदार्थको प्रयोग गरी नेपालमै युरोपिएन स्ट्यान्डर्डको उच्च गुणस्तरीय तेल बजारमा ल्याएका छौं ।’

बगरीयाले सर्वसाधारण स्वास्थ्यप्रति सचेत नभएकाले बजारमा पाइने गुणस्तरहीन खानेतेल प्रयोग गर्दै आएको आरोप लगाए ।
सूर्यमुखि र तोरीको तेल एक र दुई लिटरको बोतल तथा एक÷एक लिटरको पाउँचमा तराईका जिल्लासहित काठमाडौं र पोखरा बजारबाट बिक्रीवितरण सुरु गरिएको हो । सूर्यमुखि तेललाई एक सय ९० र तोरीको तेललाई दुई सय रुपैयाँ उपभोक्ता मूल्य कायम गरिएको छ । निम्बसले ल्यामिनेटेड नाइलन लेयरसहितको प्याकिङमा तेल उपलब्ध गराइएको छ ।

यो उद्योगले पर्साको लिपनीबिर्तामा करिब ६५ करोडको लगानीमा उद्योग स्थापना गरेको छ । चार विघा क्षेत्रफलमध्ये दुई विघामा प्रशोधन कारखाना र दुई विघामा दैनिक तीन सय मेट्रिक टन कच्चा तेल उत्पादन गर्ने कारखाना निर्माण गरिएको छ । यो उद्योगसँग भटमासतर्फ प्रति दिन सय मेट्रिक टन, सूर्यमुखितर्फ ५० मेट्रिक टन र तोरीतर्फ ६० मेट्रिक टन तेल उत्पादन गर्ने क्षमता छ ।

उद्योगले खानेतेलको कूल बजारमध्ये तोरीतर्फ १५ प्रतिशत र सूर्यमुखितर्फ २० प्रतिशत हिस्सा ओगटने गरी उत्पादन र बजारीकरणको रणनीतिलाई अघि बढाएको छ । उद्योगले तोरीको तेलतर्फ पनि अत्याधुनिक प्रविधि भिœयाएको छ ।

कोल्ड प्रेस प्रविधिको सहयोगमा आयात गरिएका तोरीको गेडालाई पेलेर तेल उत्पादन हुँदै आएको छ । यो प्रविधिअन्तर्गत तोरीमा उपस्थित प्राकृतिक र मौलिक गुणलाई नस्ट नगरी गुणस्तरीय तेल उत्पादन हुन्छ । तोरीको तेल प्याकिङमा पनि नेपालमै पहिलो पटक ल्यामिनेसन प्रविधिलाई प्रयोगमा ल्याइएको छ । यसले तेलको शुद्धता र स्वच्छतालाई लामो समयसम्म यथावत राख्छ ।

भिटामिन ए र डी समि श्रण गरी उत्पादन गरिएको सूर्यमुखिको तेल भिटामिनको कमी भएका बालबालिकालाई निकै लाभदायक हुने निम्बसले जनाएको छ । यो उद्योगले अर्जेन्टिना, ब्राजिल, युक्रेन र भारतबाट कच्चा पदार्थ आयात गरी तीन थरीका तेल उत्पादन गर्न सुरु गरेको हो । निम्बसले भारतसहित तेस्रो मुलुकबाट कच्चा पदार्थ आयात गरी नेपालमै तेल उत्पादन गर्दै आएको छ ।

निम्बस होल्डिङअन्तर्गत प्रोबायोटेक इन्डस्ट्रिज, प्रोजियोचेम इन्डस्ट्रिज, निम्बस इन्टरनेसनल कम्पनी, फेब्रिक प्लास्टिक उद्योग र निम्बस कृषि केन्द्र सञ्चालनमा छन् । यो समूहको पशुपन्छीको प्यालेट दाना निकै लोकप्रिय छ ।