काठमाडौः एपेक्स कलेजले विद्यार्थीको क्षमता विकासलाई ध्यान दिँदै सञ्चालन गरेको स्मार्ट कार्यक्रम सम्पन्न गरेको छ । तीन महिनादेखि सञ्चालन गरिरहेको उक्त कार्यक्रममा स्नातक तहका विद्यार्थीलाई सहभागी गराइरहेको कलेजले जनाएको छ । कार्यक्रममार्फत व्यवस्थापन क्षेत्रका राष्ट्रिय तथा अन्तर्राष्ट्रिय अनुभव, प्रयोग र विकासबारे विद्यार्थीलाई अध्ययनअनुसन्धान गराइएको थियो ।
विद्यार्थीको कार्यक्षमतालाई मूल्यांकन गर्न निर्णायकको समेत व्यवस्था गरेर सञ्चालन गरिएको कार्यक्रममा विश्वका प्रसिद्ध पाँच सय कम्पनीको समीक्षा गरिएको कलेजले जनाएको छ । विद्यार्थीले उक्त कम्पनीहरूको विकास, समुन्नतिका कारण, वर्तमान अवस्था, कर्मचारी व्यवस्थापनलगायत विषयमा समीक्षात्मक अध्ययनअनुसन्धान गरेका थिए । सहभागी विद्यार्थीलाई एमबीएमा अध्ययनरत विद्यार्थीले तयार पारेका तथ्यलाई निर्णायकसामु प्रस्तुत गरेका थिए ।
त्यसअन्तर्गत बीबीएमा अध्ययनरत प्राञ्जलराज घिमिरेको प्रस्तुतीकरण उत्कृष्ट भएको कलेजले जनाएको छ । स्मार्ट कार्यक्रमका सञ्चालक समितिका सदस्य महेन्द्र बस्यालका अनुसार एपेक्स कलेजले हरेक वर्ष स्मार्ट कार्यक्रम सञ्चालन गर्दै आएको छ ।
विद्यार्थीको आत्मविश्वास निर्माण र अध्ययनपछिको कार्यक्षेत्रमा सहन, कार्यक्षमता निर्माणका लागि यस कार्यक्रमले महत्वपूर्ण भूमिका निर्वाह गर्ने बस्यालले बताए । कार्यक्रममा सात सय ५० विद्यार्थीमध्ये १७ जनालाई उत्कृष्ट प्रस्तुतिकर्ता अवार्ड प्रदान गरिएको कलेजले जनाएको छ ।
प्रतिक्रिया दिनुहोस !
