काठमाडौं: सामाजिक काममा सक्रिय हाँस्यकलाकार सिताराम कट्टेल (धुर्मुस) र कुञ्जना घिमिरे (सुन्तली) ले नयाँ योजना सार्वजनिक गरेका छन् । एकीकृत बस्ती निर्माण अभियानमा जुटेका धुर्मुस सुन्तलीले तेस्रो बस्ती निर्माण गर्ने घोषणा गरेका हुन् ।
उनीहरुले एक भिडियो सार्वजनिक गर्दै मानवता र सद्भावका लागि सहकार्य गरेर साथ दिन सम्पूर्ण सहयोगीलाई अपिल गरेका छन् । भूकम्पपीडितका लागि दुई एकीकृत नमुना बस्ती निर्माण सम्पन्न गरिसकेको धुर्मुस सुन्तली फाउण्डेशनले बर्दिबास २, महोत्तरीमा एकीकृत नमुना मुसहर बस्ती निर्माण गर्ने घोषणा गरेको हो ।
गत वर्ष सरसफाइका क्रममा धुर्मुस सुन्तली उक्त बस्तीमा पुगेका थिए । चरम गरिबीको चपेटामा रहेका मुसहर तराईको पिछडिएको जाति हो । भूकम्पपीडिलाई पहिलो प्राथमिकतामा राख्दै एकिकृत बस्ती निर्माण गरेका उनीहरुले तराईमा मानवता र सद्भावका लागि काम गर्न लागेको बताएका छन्।
गाँस, बास र कपासको समेत समस्या रहेको मुसहर बस्तीमा आफूहरु पुगेपछि अहिले निकै परिर्वतन देखा परिसकेकाले ५० परिवार मुसहरलाई उपहारस्वरुप घर प्रदान गर्न लागिएको फाउण्डेशनका अध्यक्ष सिताराम कट्टेलले जानकारी दिए ।।
४ करोड ७८ लाख लगानीमा निर्माण हुने बस्तीका लागि फाउण्डेशनले गिरानचौर एकीकृत नमुना बस्ती निर्माणबाट बचेको एक करोड ३ लाख ६६ हजार ३ सय १ रुपैँया मुसहर बस्ती निर्माणका लागि खर्च गर्ने फाउण्डेसनकी कोषाध्यक्ष कुञ्जना घिमिरेले जानकारी दिइन् ।
चैत अन्तिमसम्मा नयाँ बस्ती बनिसक्ने फाउण्डेसनले जनाएको छ ।
प्रतिक्रिया दिनुहोस !
