काठमाडौः साहित्यिक संग्रहालय निर्माणका लागि राजधानीमा काव्य सप्ताह सुरु भएको छ । कपन बानेश्वर साहित्यिक साप्ताहिकको आयोजनामा सुरु भएको काव्य सप्ताहको उद्घाटन स्वास्थ्यमन्त्री गगन थापाले गरे ।
आफ्नो निर्वाचन क्षेत्रमा साहित्यिक संग्रहालय बन्ने खबरले खुसी बनाएको बताउँदै थापाले साहित्य संरक्षणमा सहयोग गर्ने वचन दिए । ‘यो महान् अभियान हो। यसमा सहयोग गर्न तयार छु’, मन्त्री थापाले भने । मन्त्री थापाले काव्य सप्ताहलाई नयाँ र पुराना साहित्यिक प्रतिभाको जमघटका रूपमा लिनुपर्ने बताए ।
आयोजकले काव्य सप्ताहमार्फत दुई करोड रकम संकलन गरेर संग्रहालय बनाउने योजना बनाएको कार्यक्रम संयोजक गोविन्द घिमिरे ‘वेदमणि’ले बताए । साहित्यकार पूर्णप्रकाश नेपाल ‘यात्री’को करिब आधा रोपनी जग्गा र त्यहाँ रहेको भवन खरिद गरी संग्रहालय स्थापना गर्ने आयोजकको योजना छ ।
वेदमणिले काठमाडौंको उत्तरपूर्वी भेगलाई साहित्यिक पर्यटकीय स्थलका रूपमा विकास गर्ने अभिप्रायले संग्रहालय स्थापनाका निम्ति पहल सुरु गरेको बताए ।
सप्ताहको पहिलो दिन डेढ लाख रुपैयाँ उठेको छ । पहिलो दिन डा. रामप्रसाद ज्ञवाली, रमेश शुभेच्छु, मेनका पोखरेल, परशुराम पराजुली ‘परासर’, दिव्य गिरी, अशोक कुँवर ‘नेत्र’ र रचना रचुले कविता वाचन गरेका छन् ।
प्रतिक्रिया दिनुहोस !
