काठमाडौः पाको, न्युरोड क्षेत्रमा आयोजना हुने न्युरोड मोबाइल महोत्सव २०७३ को तयारी पूरा भएको छ । नेपालकै सम्पूर्ण मोबाइल व्यवसायीलाई समेटिएको नेपाल मोबाइल व्यवसायी संघले यही पुस १३ गतेदेखि पुस १९ गतेसम्म मेला आयोजना गर्दैछ ।
अंग्रेजी नयाँ वर्ष २०१७ को अवसर पारेर नेपालको सबैभन्दा ठूलो र पुरानो मोबाइल केन्द्र पाको, न्युरोड, ताम्राकार कम्प्लेस, पिपुल्स प्लाजालगायत क्षेत्रमा नेपालकै सबैभन्दा ठूलो मोबाइल महोत्सव आयोजना गर्न लागेको हो ।
नेपालीले पनि गुणस्तरीय मोबाइल सेट खरिद गरून् र नठगिउन् भन्ने उद्देश्यका साथ ‘जहाँ मोबाइल बजार त्यहीं मोबाइल महोत्सव’ मूल नाराका साथ मोबाइल महोत्सव आयोजना गर्न लागिएको आयोजकले जनाएको छ । महोत्सवका संयोजक पुरुषोत्तम बस्नेतले यो महोत्सवमा सबै मोबाइल ब्रान्डको सहभागिता रहेको र अंग्रेजी नयाँ वर्षका अवसरमा मोबाइल खरिदकर्तालाई अधिकतम छूट उपलब्ध गराउने बताएका छन् ।
उनले अंग्रेजी नयाँ वर्ष सुरु हुँदै गर्दा आफ्ना नजिकका साथीभाइ तथा परिवारलाई मोबाइल उपहार दिने यो सबैभन्दा उपयुक्त अवसर भएको बताए । मोबाइल महोत्सवका सहसंयोजक आविष्कारलाल श्रेष्ठले न्युरोड मोबाइल महोत्सवमा आउने हरेक ग्राहकलाई हात खाली नजाने उपहार राखिएको बताएका छन् ।
उनले आफूहरू ग्रे मार्केटका कुनै पनि उत्पादन बिक्री नगर्ने र ग्राहकलाई स्तरीय सामानमात्र उपलब्ध गराउन प्रतिबद्ध रहेको बताए । महोत्सव अवधिभर स्मार्टफोन खरिदकर्तालाई एनसेलको सिम तथा १०० एमबीको डाटा अफरमा दिनेछ ।
त्यसैगरी ग्राहकले मोबाइल खरिदमा विभिन्न ब्रान्डका स्मार्टफोन दैनिक रूपमा लक्की ड्रमार्फत प्राप्त गर्नेछन् भने अन्य विभिन्न उपहार पनि दैनिक रूपमा वितरण गरिने आयोजकले जनाएको छ ।
प्रतिक्रिया दिनुहोस !
